KOVALIMA, 26 Maiu 2025 (TATOLI) – Ministériu Agrikultura, Pekuária, Peska no Floresta (MAPPF) sei konstrui irrigasaun ne’ebé ho naran Lomea iha Postu administrativu Zumalai, Munisípiu Kovalima atu distribui bee ba agrikultór sira hodi hasa’e produsaun hare-kulit.
“Tinan ne’e iha Kovalima sei halo kontrusaun irrigasaun mota Lomea ne’ebé nia prosesu tama iha faze konkursu públiku – la’o ona. La kle’ur tan, ha’u sei asina kontratu atu konstrui irrigasaun hodi kobre área rihun rua-resin nune’e bele distribui bee iha Maukola ho Kuluoan”, Ministru Agrikultura, Pekuária, Peska no Floresta, Marcos da Cruz, relata ba jornalista sira, iha aldeia Beilaku, ohin.
Prosesu, tuir Governante ne’e katak daudaun ne’e iha ona Komisaun Nasionál Aprovizionamentu (CNA-sigla portugés).
Munisípiu Kovalima, munisípiu potensiál atu halai natar hodi hasa’e produsaun hare-kulit iha munisípiu tanba ne’e Governu buka meiu atu kria kondisaun ba agrikultór sira.
“Ita hatene Suai, área ne’ebé potensiál ba natar nune’e governu buka atu kria kondisaun atu konstrui infraestrutura importante sira; Oebaba halo ona, atu halo tan iha mota Lomea”, nia informa.
Atu hasa’e produsaun, governu destaka eskavadór nune’e atu bele distribui bee ba natar no distribui mákina modernu hodi fasilita agrikultór sira ho sistema agrikultura modernu.
Kona-ba orsamentu atu konstrui irrigasaun Mota Lomea, nia parte la lembra ho detallu, bainhira asina kontratu ho kontratór mak bele hatene maibé orsamentu liu millaun 10 tanba irrigasaun boot .
Ho mákina sira ne’ebé mak Governu fó apoiu, husu agrikultura atu servisu maka’as maibé produsaun tinan ne’e hatudu nia rezultadu di’ak, tanba ektare ida rezultadu atinji tonelada 5.3
Tuir dadus área ne’ebé kultiva rihun-haat nia rezultadu bele hetan tonelada rihun-11, prodús husi agrikultura Kovalima.
Notísia relevante:Produsaun hare-kulit iha Kovalima atinji tonelada rihun-12 resin
Jornalista:Celestina Teles
Editór: Rafael Ximenes de A. Belo
