Membru Komisaun B husu parte relevante atu investiga kle’an kazu Kailaku

DILI, 26 Maiu 2025 (TATOLI)—Komisaun B ne’ebé trata asuntu Negósiu Estranjeiru Defeza no Seguransa iha Parlamentu Nasionál (PN) husu parte relevante sira atu halo investiga kle’an ba kazu konflitu ne’ebé akontese iha Kailaku, munisípiu Bobonaru.

Membru Komisaun B, Luís Roberto da Silva, hateten, nia parte akompaña kazu ne’ebé foin lalais akontese iha Kailaku, iha ámbitu komemora loron Restaurasaun Independénsia 20 Maiu ba da-23, iha ne’ebá hamosu konflitu entre joven sira tuda malu no baku malu to’o rezulta joven ida lakon vida.

“Nu’udar Deputadu, husu nafatin ba Ministériu kompetente no seguransa sira atu halo sira-nia knaar di’ak nafatin no profisionál, husu mós ba PSIK, entidade hotu no Ministériu hotu ne’ebé relevante ba iha setór justisa atu halo investigasaun kle’an mós ba kazu ne’e,” Deputadu Luís Roberto da Silva, hato’o iha resintu PN, Segunda ne’e.

Nia dehan, kazu ne’e rasik seidauk indentifika loloos no Komisaun B seidauk simu relatóriu ruma.

“Akontese iha Kailaku ida loloos labele akontese tanba 20 Maiu ne’e loron importante ba joven sira atu halo reflesaun ne’ebé kle’an hodi hanoin luta na’in sira-nia luta ne’ebé Timor-Leste hetan indepedénsia. Ita-nia ukun an la sosa ho buat Kma’an, maibé sosa ho ruin no ran mak hetan ukun-an, tanba ne’e mak tuir loloos joven sira tenke partisipa másimu iha serimónia espesiál sira, la’ós partisipasaun ita lori fali arte-marsiál ba fali iha eventu importante sira hanesan ne’e, abuza malu, hemu tua, deskontrola linguajen bele hamosu konflitu entre joven sira,” Deputadu lamenta.

Notísia relevante : PNTL hahú investiga kazu konfrontu Kailaku ne’ebé hakotu Ronaldinho nia moris   

Deputadu katak, tanba akontese ona, husu nafatin ba seguransa sira atu hala’o knaar ho di’ak.

“Ita hatene katak ema mate ona ita sei la halo justisa ho ema mate ne’e, maibé buka tuir ida suspeitu loloos ne’ebé maka lori nia liman rasik hodi hakanek ita-nia joven ne’e to’o mate halo investigasaun kle’an ba ida ne’e hodi prosesu tuir lei ne’ebé mak iha,” nia hato’o.

Membru Komisaun B espera katak parte seguransa bele indentifika oknum balun ne’ebé maka envolve iha kazu ne’e.

“Ha’u seidauk fó sala ba seguransa, ha’u seidauk fó sala ba kualker grupu ida, só dehan de’it katak nasaun ida-ne’e iha lei nia okos, tanba ne’e presiza identifikasaun no investigasaun kle’an hodi buka tuir suspeitu ne’ebé maka autór loloos ba iha kazu ida-ne’e,” nia reforsa.

Relasiona deklarasaun Primeiru-Ministru, Kay Rala Xanana Gusmão, ne’ebé hakarak taka totál arte-marsiál, nia parte dehan, arte-marsiál ne’e la boot liu Estadu, maibé hanesan grupu ki’ikoan ida-ne’ebé hamahan-an iha Estadu nia okos, tanba ne’e buat hotu lei mak sei manda ne’ebé arte-marsiál labele manda fali Governu ka Estadu, karik grupu ruma hamosu konflitu ne’ebé viola lei, Estadu no Governu iha kompeténsia atu taka no suspende.

“Governu bele foti desizaun taka totál arte-marsiál maibé presiza haree no halo estudu kle’an hodi haree tanba saida mak grupu ne’e sai fali autór iha nasaun ida-ne’e. Ita bele hanoin taka de’it, bainhira ita seidauk hatene nia kauza loloos, mak hamosu nafatin konflitu ba futuru, normalmente nasaun ne’ebé de’it sempre hamosu konflitu, violénsia maibé Estadu ka Governu ida iha kapasidade atu rezolve, labele hasai liafuan ba taka ne’e de’it, tanba taka ne’e ohin taka laiha problema, maibé la signifika katak ohin taka arte-marsiál aban laiha tan problema, ne’e ha’u la fiar,” nia tenik.

Tuir nia, importante maka Governu tenke iha maneira ka planu hodi bele kria atividade ne’ebé di’ak ba timoroan no joven sira atu kapasita sira atu sira mós bele partisipa iha dezenvolvimentu nasaun.

Jornalista     : Arminda Fonseca

Editora         : Julia Chatarina