DILI, 21 Maiu 2025 (TATOLI)—Diretór Investigasaun Kriminál Nasionál, Superintendente Polísia João Belo dos Reis, hateten ekipa Diresaun Investigasaun Kriminál Nasionál hamutuk ho Unidade Espesiál Polísia reforsa Komandu PNTL Bobonaru hodi halo investigasaun ba kazu konfrontu ne’ebé akontese iha Postu Administrativu Kailaku, Munisípiu Bobonaru, tersa (20/5), ne’ebé hakotu Ronaldinho da Costa nia moris.
Nia haktuir, kazu ne’e akontese purvolta 11: 00 Otl iha ámbitu serimónia isár bandeira hodi komemora Loron Restaurasaun Independénsia RDTL ba dala XXIII, 20 Maiu, ne’ebé hala’o iha edifísiu Postu Administrativu Kailaku, iha-ne’ebé bainhira serimónia isár bandeira la’o no lee hela mensajen Prezidente Repúblika, derepente husi grupu arte marsiál rua tuda malu to’o tama ba fatin serimónia nune’e mak polísia halo atuasaun.
“Isár bandeira sa’e ona, prosesu serimónia la’o hela mak sira tuda malu husi fatin ida mai afeta to’o fatin serimónia. Atu ne’e krime, laiha disiplina, laiha espíritu nasionalizmu, tanba iha fatin ida-ne’e la’o hela serimónia importante nasaun nian, más ita hatudu ita-nia vandalizmu iha serimónia ofisial sira hanesan ne’e,” João Belo hateten ba jornalista iha Kuartél Jerál Polísia Nasionál Timor-Leste (PNTL), Kaikoli, kuarta ne’e.
Nia dehan, problema tuda malu entre grupu arte marsiál rua molok ne’e akontese ona, tanba iha loron 19 Maiu kalan, grupu rua referidu halo problema to’o tuda no asalta malu hodi rezulta veteranu ida nia uma estragadu, nune’e iha 20 Maiu, grupu rua kontinua provoka malu no asalta malu hodi hamosu konfrontu to’o tama fatin isár bandeira no ikus rezulta joven ida mate.
Belo hateten, ba kazu ne’e, Komandante Jerál PNTL orienta kedas Diresaun Investigasaun Kriminál no Unidade Espesiál Polísia hodi dezloka bá Kailaku hodi halo investigasaun ba kazu ne’e.
“Relatóriu ami simu ona, maibé ami hateten iha-ne’e katak buat hotu-hotu investigasaun mak sei determina,” nia subliña.
Belo informa, bazeia ba relatóriu ne’ebé mak Komandu PNTL Bobonaru relata mai iha Investigasaun Kriminál Nasionál katak membru polísia halo atuasaun ho tiru teiu no tiru teiu ida-ne’e tuir prosedimentu atuasaun, maibé dala ida tan investigasaun mak sei determina.
Notísia relevante: Aban, Forénsiku HNGV halo autopsia ba matebian Ronaldinho Mota Ximenes
Nia akresenta, kazu sira hanesan ne’e, medida atuasaun ba utilizasaun arma ne’e bele tiru teiu, nune’e salva nia aan no ema seluk ne’ebé iha nia oin.
Nia relata katak ba joven Ronaldinho nia mate ne’e, tuir relatóriu ne’ebé mak iha, hafoin akontesimentu kle’ur tiha mak vítima nia aman bá reklama iha Eskuadra Polísia Kailaku katak nia oan hetan tiru husi polísia.
“Maibe, atu dehan katak atuasaun ne’ebé polísia halo ne’e tuir prosedimentu. Atuasaun lijítimu, katak polísia bele halo ida-ne’e atu asegura ema seluk nia vida no asegura nia vida rasik. Ne’e mak prosedimentu uza arma nian, maibe nia tenke responsabiliza tanbasá maka nia uza,” Belo esklarese.
Nia husu Ministériu Públiku halo autopsia hodi identifika katak matebian mate tanba polísia mak tiru, ka tanba ho objetu seluk ruma mak hakotu nia vida.
Tanba ne’e, nia husu família kontinua kalma tanba kuandu ospitál finaliza tiha autopsia sei haruka ba polísia nune’e polísia enkamiña rezultadu autopsia bá Ministériu Públiku.
Belo mós solisita joven sira iha territóriu Timor-Leste laran tomak katak tempu agora ne’e tempu buka moris ba idak-idak nian no kontribui ba pás no estabilidade iha nasaun ne’e.
Jornalista: Natalino Costa
Editór: Xisto Freitas da Piedade
