DILI, 21 Maiu 2025(TATOLI)—Xefe Departamentu Forénsiku Hospital Nacional Guido Valadares (HNGV), Nilton Tilman, hateten, aban (22/05), Forénsiku sei halo autopsia ba matebian Ronaldinho Mota Ximenes (23) ne’ebé transferidu husi Ospitál Maliana.
“Loloos, ohin, ita halo autopsia ba matebian Ronaldinho Mota Ximenes ne’ebé transferidu husi Ospitál Maliana. Daudaun ne’e, mate-isin ita tau hela iha konjeladór,” Nilton Tilman dehan ba jornalista sira, iha nia kna’ar fatin, Mortuáriu HNGV, kuarta ne’e.
Notísia relevante: Médiku sira la hetan objetu ruma iha matebian Ronaldinho Mota nia isin
Nia haktuir, tanba kestaun téknika balun iha-ne’ebá, entaun halo autopsia bá fali aban dadeer.
Bainhira autopsia ramata, nia tenik, Forénsiku HNGV sei haree didi’ak relatóriu durante loron tolu ka másimu loron hitu hafoin submete ba Ministériu Públiku.
Forénsiku HNGV autopsia kazu hamutuk 18
Iha biban ne’e, Xefe Departamentu Forénsiku informa katak iha trimestre dahuluk ekipa forénsiku halo outopsia ona kazu hamutuk 18.
Nia esplika, kazu 18 kompostu husi mane na’in-11 no feto na’in-hitu.
“Iha fulan Janeiru tinan ida-ne’e, ami halo outopsia kazu tolu (mane rua no feto ida), ne’ebé mak kompostu husi kazu omesídiu oho malu, depois iha Fevereiru outopsia kazu hitu hanesan omesídu (oho malu) na’in-ida, mate naturál tolu (mane rua, feto ida) no kazu asidente tráfegu tolu. Iha Marsu, kazu hitu hanesan omesídu rua (mane de’it), oho-aan (feto rua no mane ida), depois mate naturál rua,” Nilton Tilman dehan.
Nia esklarese, Forénsiku nia servisu, fatin ida ne’ebé mak atu halo prosedimentu hodi ajuda ka tulun parte judisiáriu sira, hodi foti desizaun ba kazu ida, hodi hatene loloos kauza husi mate.
Outopsia ne’e, nia esplika, prosedimentu ne’ebé mak halo bazeia ba mandadu husi Tribunál, la’ós Klínika Forénsika.
Jornalista: Felicidade Ximenes
Editór: Xisto Freitas da Piedade
