Médiku sira la hetan objetu ruma iha matebian Ronaldinho Mota nia isin
BOBONARU, 20 Maiu 2025 (TATOLI)–Durante prosesu operasaun ba matebian Ronaldinho Mota Ximenes (23), médiku espesialista sirurjia no ortopedia iha Ospitál Referrál Maliana (HRM-sigla portugeza), tersa ne’e, la hetan imbolku ka objetu ruma iha matebian ne’e nia isin.
Doutór Anaténsia no Xefe Sala Operasaun HRM, Francisco Amaral da Costa, haktuir pasiente hakotu-iis (mate) iha tuku 14:10 Otl bainhira doutór Kubanu espesialista sirurjia no ortopedia ho ekipa sira halo hela operasaun.
Notísia Relevante:Konfrontu iha Kailaku, UEP koloka membru sanulu halo atuasaun
“Bainhira halo operasaun, doutór ne’e hatama liman diretamente ba nia korasaun, kaer fuan la funsiona ona, entaun ami hotu foti liman. Durante ami opera ne’e, ami la hetan buat ida. Ami hatene mak ida ko’ak ne’e de’it, tan ne’e lori bá autopsia mak hatene. Bá iha-ne’ebá loke saida mak iha ne’ebá, ai ruma ka buat ruma, ne’e sira Forénsiku mak hatene,” nia hateten hodi responde pergunta husi ekipa Provedor dos Direitos Humanos e Justiça (PDHJ) no jornalista sira, iha nia knaar fatin, tersa ne’e.
Nia haktuir, molok halo operasaun iha sala emerjénsia, médiku sira sei hala’o uluk síklu vitál liuhusi koko pasiente nia tensaun ho fuan, rezultadu normál no pasiente sei konxiente aan hela, maski la ko’alia.
Xefe Ekipa Operasaun ne’e reforsa, pasiente mai ho kondisaun kanek ka ko’ak-boot iha parte peitu, pulmaun rahun hotu no raan sai barak.
“Doutor Kubanu loke ne’e, parte pulmaun nia kraik rahun hotu kedas, entaun rahun ne’e doutór tesi tiha hotu suku fali. Hafoin suku, teki-teki pasiente colaps, ninia fuan la tuku-tuku no la dada-iis ona. Entaun, ami halo re-animasaun, ami baku iha peitu-matan fó ai-moruk para fuan bele tuku. Ami baku-baku durante atu besik oras ida. Tuir protokolu, ita halo re-animasaun liuhusi minutu 40 atu bá oras ida mak nia laiha sintoma ruma, ne’e ita bele deklara pasiente mate,” Francisco esplika.
Enkuantu, mate-isin daudaun ne’e iha ona Hospital Nacional Guido Valadares Dili hodi submete ba prosesu autopsia.
Jornalista: Sergio da Cruz
Editór: Xisto Freitas da Piedade
