KOVALIMA, 27 Maiu 2025 (TATOLI) – Diretór Servisu Agrikultura Munisípiu Kovalima (SMAK), Lino Magno informa, Agrikultór iha postu Zumalai kuda hare iha époka ba dahuluk de’it enkuantu époka ba daruak la kuda, tanba falta bee atu distribui ba natar sira.
Agrikultór sira halai natar depende de’it ba irrigasaun mota Mola mak hodi distribui bee ba natar sira iha Zumalai tomak, mak halo agrikultór sira halai natar hodi hasa’e produsaun hare-kulit iha Postu administrativu Zumalai, munisipiu Kovalima
Tuir loloos irrigasaun Oebaba mós bele distribui bee ba natar sira iha Beilaku, tanba iha tempu okupasaun Indonézia hakotu tiha irrigasaun iha área Selerena nune’e bee la to’o atu distribui mai to’o iha Beilaku.
“Ha’u observa povu agrikultór ne’ebé badinas atu hasa’e produsaun hare-kulit ne’e agrikultór husi Beilaku de’it. Agrikultór la kuda hare iha époka ba daruak tanba bee la iha atu distribui ba natar atu agrikultór sira hasa’e produsaun hare-kulit bainhira hadi’a irrigasaun Selerena, distribui bee, agrikultór sira prontu atu halai natar ba époka daruak nian”, Dirijente agrikultura dehan ba TATOLI iha Tabakolot, ohin.
Tuir dadus, tratór liman ne’ebé Ministériu apoiu mai iha Kovalima hamutuk 30. Husi númeru ne’e koloka ba agrikultór sira iha Zumalai hamutuk unidade 14 atu halai natar tanba ne’e presiza kuidadu.
Agrikultór Trifonia Lopes reforsa, Agrikultór sira prontu atu hasa’e produsaun hare-kulit ba époka dahuluk no daruak nian, maibé hasa’e produsaun iha époka ba dahuluk de’it ba époka daruak la hasa’e produsaun tanba menus bee atu distribui ba natar.
“Ami la hasa’e produsaun iha époka ba daruak nian tanba husik animál livre halo ami labele halo lutu, rai ektare rua tolu, nune’e ami abandona problema seluk mós falta bee atu distribui”, nia dehan.
Ho problema husik animál livre rezulta rai barak kontinua abandona. Agrikultór sira la halai natar tanba atu halai natar presiza halo lutu – ida-ne’e servisu ne’ebé todan ba agrikultór sira.
Jornalista:Celestina Teles
Editór: Rafael Ximenes de A. Belo
