DILI, 27 Maiu 2025 (TATOLI)—Xefe Departamentu Sekretariadu Apoiu Tékniku Administrasaun iha Diresaun Nasionál Transporte Terrestre (DNTT), Nelson Sequeira Martins, informa, daudaun semáforu iha Kolmera la funsiona tanba kauza husi Ministériu Obra Públika (MOP) hadi’a hela trotoár sira iha parte ne’ebá.
“Ami haruka ona karta ba MOP atu hadi’a tanba sira mak sobu bainhira hadi’a trotoár,” Nelson Sequeira Martins, informa ba Ajénsia TATOLI, Tersa ne’e.
Semáforu sira agora iha kapitál daudaun hamutuk 10, iha haat moderniza ona enkuantu neen seidauk.
“Balun funsiona no balun lae, hanesan parte iha Katedrál, Bidau no seluk tan, sira ne’e planu atu moderniza hotu iha tinan oin,” nia akresenta.
Nelson Sequeira, esplika, parte Katedrál nian ne’e labele hadi’a tanba instalasaun fiu sira iha rai okos ne’e kleur ona, tanba ne’e kotu hotu no presiza hadi’a.
“Maibé atu hadi’a, daudaun planu ona atu moderniza hotu, nune’e presiza orsamentu boot tenke diskute iha Konsellu Administrasaun Fundu Infraestrutura (KAFI) entaun sei hadi’a hotu iha tinan oin,” nia katak.
Notísia relevante : Semáforu modernu haat iha kapitál hahú funsiona
Iha sorin seluk, Xefe Departamentu Manutensaun no Konservasaun Rodaviária, Rogério da Costa Freitas, hateten sira-nia parte prontu atu koopera bainhira DNTT haruka ona karta ba minitériu no to’o ba sira.
“To’o agora karta seidauk to’o ha’u-nia meza maibé karta kuandu to’o ami hotu sei tun terrenu hodi haree fiu liga iha rai okos ne’e hodi hadi’a,” nia tenik.
Antes ne’e, instalasaun ba semáforu modernu foun to’o fulan Abríl atinje ona 50%, semáforu haat funsiona hotu ona falta de’it instalasaun ekipamentu Teknolójia Informátika (IT) Closed Circuit Television (CCTV) no CCTV room iha DNTT Balide.
Jornalista : Arminda Fonseca
Editora : Julia Chatarina
