DILI, 27 Maiu 2025 (TATOLI)-Governu liuhusi Ministériu Solidariedade Sosiál no Inkluzaun (MSSI), sei gasta rihun $38.557 ba loron nasionál Ema ho Defisiénsia (EhD) ne’ebé sei akontese iha Munisípiu Manatutu, loron 4 fulan-Jullu tinan ne’e.
Diretór Nasionál ba ema ho defisiénsia iha Ministériu Solidariedade Sosiál no Inkluzaun (MSSI), Domingos Hendriques Maia, hatete husi totál osan ne’e, $28.480 maihusi governu no $10.700 husi parseiru UN-Woman.
Razaun hili Manatutu sai fatin selebrasaun, Maia dehan dadus sensu uma-kain 2022 hatudu munisípiu referidu ninia persentajen EhD 1.9.
Objetivu husi realiza loron nasionál ne’e mak promove igualdade, reabilitasaun, reintegrasaun, no aumenta progresu sosiál.
“Ita hakarak promove igualidade, oportunidade, partisipasaun ativa ba kualidade moris iha ema ho defisiénsia hanesan kontribuisaun ba prosesu dezenvolvimentu sosiu-ekonómiku iha Timor-Leste”, katak nia.
Atividade seluk, nia dehan vízita domisiliáriu, asisténsia umanitária, tratamentu saúde, atendimentu dokumentu kartaun eleitorál, billete identidade no sertidaun moris. Husi atividade sira ne’e halo ona koordenasaun ho parte kompetente.
Tempu hanesan, MSSI mós entrega apoiu pontuál ba EhD hodi halo negósiu autosustentável. Halo enkontru avaliasaun ho grupu tékniku entreministeriál hodi ko’alia konaba planu asaun ba EhD.
Konvidadu ba loron ne’e, nia realsa konvida embaixadór sira iha TL, pontu vogál ba EhD iha liña ministeriál inklui sosiedade sivíl.
Sei iha mos misa agradesimentu, la’o ain no divertimentu múzika.
Notísia relevante: Governu kontinua tau atensaun sériu ba Ema ho Defisiénsia sira
Jornalista : Osória Marques
Editora : Rita Almeida
