BOBONARU, 27 Maiu 2025 (TATOLI)-Tribunál Judisiál Primeira Instánsia Suai (TJPIS), hahú segunda to’o sesta (26-30 Maiu 2025) ne’e, hala’o atividade julgamentu movel iha Munisípiu Bobonaru ne’ebé realiza iha edifísiu komandu Munisípiu Polísia.
Notísia Relevante: Tribunál Suai aplika TIR ba timoroan lori kilat-musan ultrapasa fronteira
Juís Administratór Tribunál Munisípiu Kovalima, Naasson Doutel Sarmento, hateten prosesu krime totál 35 mk designada ba julgamentu móvel, ne’ebé kompostu husi koletivu 22 no singulár 13.
“Prosesu koletivu maioria krime kontrabandu, arma branka/arma proibida. Prosesu singulár maioria Krime ofensas ba integridade fízika simples ho forma violênsia doméstika,” Nia informa ba Agência Tatoli, tersa ne’e.
Julgamentu Movel ne’e realiza husi juiz na’in-tolu (3) mak hanesan Naasson Sarmento, Samuel Pacheco ho Patrícia Xavier, ofisiál justisa na’in-tolu (3), pesoál seguransaa polísia na’in-ida (1), tradutór na’in-ida (1) ho motorista na’in-ida (1).
Atividade Julgamentu movel ne’e sei realiza mós iha munisípiu sira ne’ebé área judisiál Tribunál Munisípiu Kovalima.
Tuir dadus ne’ebé Tatoli asesu hatudu katak, iha 2024, Polísia Nasionál Timor-Leste (PNTL) Komandu Munisípiu Bobonaru Seksaun Ivestigasaun Kriminál, konsege prosesa kazu krime bazeia ba kodigu penál Timor-Leste hamutuk 313 ne’ebé kompostu husi Kazu krime omesidiu sia (9), Kazu Ofensa Integridade Simples 109, kazu kontra bandu 96, kazu aus tratu konjuge 23, kazu Danu simples 11 no prosesu kazu arma proibida 10.
Bazeia ba relatoriu 2024, SEKIK mós ezekuta mandadu julgamentu husi Tibunál Judisiál Primeira instánsia Suai hamutuk 72, Mandadu prizaun 12, konsege ezekuta ona 11 no falta ida (1) mak seidauk.
Notísia Relevante: PNTL Bobonaru prosesa kazu krime 313 iha 2024
Jornalista : Sergio da Cruz
Editór : Cancio Ximenes
