BOBONARU, 13 Marsu 2025 (TATOLI)—Polísia Nasionál Timor-Leste (PNTL) Komandu Munisípiu Bobonaru Seksaun Ivestigasaun Kriminál, iha 2024 ne’e, konsege prosesa kazu krime hamutuk 313, no husi totál númeru ne’e kazu Ofensa Integridade Simples mak rejista aas liu ho totál kazu 109.
Notísia Relevante: Janeiru-agostu 2024, PNTL Bobonaro rejista kazu 222 iha MP
Bazeia ba relatoriu 2024, SEKIK mos ezekuta mandadu julgamentu husi tribunál primeira instánsia Suai hamutuk 72, Mandadu prizaun 12 konsege ezekuta ona 11 no falta ida (1).
Enkuantu, kazu krime bazeia ba kódigu penál Timor-Leste hamutuk 313, Kazu krime omesidiu sia (9), Kazu Ofensa Integridade Simples 109, kazu kontra bandu 96, kazu aus tratu konjuge 23, kazu Danu simples 11 no prosesu kazu arma proibida 10.
“Kazu sira-ne’e domina mak Ofensa Integridade Simples ho totál 109, nia númeru ida (1),” Komandante PNTL Munisípiu Bobonaru, Superintendente Xefe Agostinho Gomes da Silva, hateten durante aprezenta relatóriu servisu tinan 2024 ba Ministru Interiór, Fransisco da Costa Guterres, iha Kuartél Komandu Munisípiu Polisía Bobonaru, kinta ne’e.
Komandante ho diviza Ai-funan tolu ne’e konfirma kazu omesidiu sia (9) ne’e kompostu husi tipu kazu infantisidade ida (1), suisidiu rua (2) no kazu omesidiu puru neen (6).
“Entre kazu sira-ne’e iha kazu rua mak suspeitu deskoñesidu, maibé ita halo esforsu ida konsege identifika no aprezenta ba Ministériu Públiku no ida horisehik mak foin toman,” nia dehan.
Aleinde ne’e, iha tinan kotuk, Komandu Munisípiu Polisía Bobonaru liuhusi Seksaun Tránzitu Seguransa Rodoviáriu mós rejista sidadaun sira kontra orden hamutuk 608, Viola lei kódigu estrada 181, hanesan la uza kapasete 420, prosesu karta kondusaun liu prazu 60, prosesu karta kondusaun la tuir kategoria sia (9), prosesu kazu la lori dukumentu orijinál125, kazu inspeksaun liu prazu 180, prosesu kazu Kanu-resin ualu (8), la monta xapa matrikula 10, karreta ne’ebé seidauk rejistu 14.
Prosesu kazu tula ema liu lotasaun motor ualu (8), tula sasán liu lotasaun karreta lima (5), Tula no hatun pasajeiru la’ós iha terminál 17, laiha asesoría veikulu 28, laiha lisensa trajektu haat (4), kondús karreta ho kondisaun lanu ida (1).
“Husi ida-ne’e ita hetan koima rihun $61 ne’ebé ita aplika ba infratór sira iha 2024,” Antigu Komandante Unidade Patrullamentu Fronteira ne’e hateten.
Enkuantu iha 2024 ne’e, Seksaun Tranzitu Seguransa Rodoviáriu, Komandu Munisípiu Polisía Bobonaru mós rejista kazu asidente 95, kompostu husi asidente envolve motor ho motor 38, motor ho karreta 19, motor ho ema no kareta ho ema haat (4), asidente singulár motor monu rasik 13 no karreta baku-fila neen (6).
Asidente Trafegu ne’e rezulta kanek kmaan 123, kanek grave 12, mate neen (6) no husi totál kazu hirak ne’e kazu tránzitu rezolvidu 85, kazu pendent ida (1) no kazu refere ba ministeriu públiku primeira instánsia Maliana hitu (7).
Husi parte Seksaun Justisa no Dixiplina, Komandu Munisípiu Polisía Bobonaru iha tinan 2024 ne’e rejista membru PNTL ne’ebé halo infrasaun dixiplina hamutuk 35, kazu sira-ne’ebé halo prosesu iha Komandu Munisípiu Polisía Bobonaru hamutuk 13.
Husi númeru ne’e finaliza ona 11 sei kontinua prosesu rua (2), rekomenda prosesu ba iha Komandu jerál PNTL 18, arkiva sein pena rua (2), aplikasaun pena ba infratór sira hamutuk neen (6), pena dixiplina represaun eskrita rua (2), pena dixiplinar suspensaun loron 10-30 kazu haat (4) no arkivamentu sein pena rua (2).
Notísia Relevante: Tránzitu Bobonaru sei halo auto-stop ba viatura Estadu iha loron finadu
Jornalista : Sérgio da Cruz
Editór : Cancio Ximenes
