Tránzitu Bobonaru sei halo auto-stop ba viatura Estadu iha loron finadu
BOBONARU, 24 outubru 2022 (TATOLI)-Komandante Polísia Nasionál Timor-Leste, komandu munisípiu Bobonaru, superintendente Antoninho Mauluta, hateten Polísia Seksaun Tránzitu (PolTrans) sei halo auto-stop (revista) ba viatura Estadu molok tama iha loron finadu to’o remata.
Atividade ne’e atu kontrola veíkulu Estadu ne’ebé movimenta iha munisípiu Bobonaru la tuir regra ho baze ba sirkulár númeru 01/VIII/GM-MF/2022-01 ne’ebé fó-sai hosi Ministériu Finansa, iha sesta loron 14 fulan-fevereiru tinan 2022, katak kargu xefia sira iha instituisaun públiku tenke estasiona iha eskritóriu.
Dekretu-lei númeru 8/2013, ne’ebé define kona-ba utilizasaun viatura Estadu, katak utiliza ba de’it finalidade servisu, bainhira halo movimentu, tenke iha karta autorizasaun. Dekretu ne’e define períodu normál viatura Estadu, hosi dadeer tuku 07:00 to’o kalan tuku 19:00 otl, no hirak ne’ebé la kumpre no laiha autorizasaun, maka sei hetan sansaun ruma.
Notísia Relevante:PDHJ Maliana no instituisaun relevante sei kontrola veíkulu estadu iha outubru
“Ha’u hanoin ida ne’e despasu kleur ona, ita sei hatutan de’it, ida ne’e ita sei hala’o, oras ne’e dadaun ita orientá ona tránzitu inklui task force, bainhira atu tama iha finadu ita halo cek-point iha dalan-dalan ba transporte sira, inklui Estadu nian, la’o tuir regra ka lae, tanba orientasaun dehan kareta ne’e atu la’o so orden no guia de marsa laiha, ita preende depois relata ba nasionál”, katak nia ba jornalista sira iha ninian knaar fatin.
Komandante Mauluta dehan, sei orienta ekipa tránzitu lansa avizu ba transporte públiku, liu-liu bus diresaun Dili-Maliana inklui anguna sira atu movimentu tuir regra. Avizu liuhosi meiu seluk mak lansa iha Radio Komunidade Maliana (RKM).
“Fó hanoin ba ita nia kondutór sira katak tula sasán no ema karik labele liu hosi ninia kapasidade, tanba dalabarak sira tula ema sa’e to’o leten, ne’e labele ida”, nia afirma.
Mauluta dehan tan, dadaun ne’e komandu munisípiu mós prepara ona planu seguransa hodi koloka membru efetivu sira iha fatin risku ba konflitu sira atu asegura loron finadu bele la’o ho ambiente pás.
Notísia Relevante:Viola kódigu estrada, PNTL Bobonaru halo apreensaun ba motór 21
Jornalista : Sérgio da Cruz
Editora : Rita Almeida
