BOBONARO, 29 agostu 2024 (TATOLI)-Hahú husi fulan-aneiru to’o 27 agostu 2024 ne’e, Polísia Nasionál Timor-Leste (PNTL) seksaun investigasaun kriminál munisípiu Bobonaro rejista kazu hamutuk 222 ba Ministeriu Públiku atu kontinua prosesu tuir lei ne’ebé vigora iha Timor-Leste.
Dadus ne’e relata husi Xefe Seksaun Imvestigasaun Kriminál Munisípiu Bobonaro, Asistente Inspetór Alexandre Rego Mota, iha enkontru Konsellu Seguransa Munisípiu ne’ebé realiza iha kuartél PNTL Bobonaro, tersa ne’e.
Nia esplika, kazu hirak-ne’e komandu Polísia Munisípiu Bobonaro prosesa, relata husi eskudara polísia iha postu administrativu neen.
Notísia relevante: PNTL Bobonaro rejista krime 121 entre Janeiru no Jullu
“Ita atende kazu tomak iha Munisípiu Bobonaro, ita rejista ona ba Ministeriu Públiku hamutuk 222, ne’e kualkér kazu, ita entregra ba MP hodi prosesu ba iha akuzasaun iha Tribunál,” nia hateten.
Asistente Inspetór Polísia ne’e salienta, husi totál kazu hirak-ne’e seksaun investigasaun kriminál munisípiu Bobonaro rejista kazu omisídiu sia durante fulan ualu nia laran.
Kazu hirak-ne’e akontese iha postu administrativu Maliana kompostu husi omisídiu tolu, infantisídiu ka kazu soe bebé ida, iha Balibó kazu omisídiu simples ida ne’ebé akontese iha suku Cowa.
Alende ne’e iha postu administrativu Bobonaro kazu omisídiu simples ida akontese iha suku Soilesu ne’ebe maun oho alin no kazu tara-an rua akontese iha suku Malilait ho suku Ai-Asa no postu administrativu Cailaco kazu tara-an ida.
Husi kazu sia ne’e kazu omisídiu simples ne’ebé akontese iha área Lale, suku Tapo-Memo, postu administrativu Maliana no suku Cowa, postu administrativu Balibó mak to’o agora suspeitu deskoñesidu.
“Kazu ida Lale, señór Alo mate iha du’ut laran ne’e ita rejistu ona ba Ministériu Públiku, ida kazu Cowa nia ne’e dadeersan mak ita hetan inan-feton ne’e mate tiha ona, maibé suspeitu deskoñesidu, maibé tuir orientasaun komandu nia ita buka nafatin maske kleur, ita fiar katak ita sei hetan,” nia promete.
Hosi totál kazu hirak-ne’e PNTL Bobonaro simu mandadu detentasaun ba julgamentu husi tribunál hamutuk 40.
Alende ne’e simu mós mandadu detensaun ba kumpre pena prizaun hamutuk 14, husi totál ne’e seksaun investigasaun kriminál munisípiu Bobonaro konsege ezekuta ona 11.
“Hela tolu, ne’e ita la ezekuta tanba ida agora ninia paradeiru iha hela Inglatera, ida fali husi Bobonaro ita buka tuir maibé ninia naran doubru inan-aman hanesan, tanba ne’e ita seidauk ezekuta, ida iha hela Batugade ita seidauk ezekuta tanba sei la’o hela ho atividade ne’ebé agora ita preokupa hela ne’e,” nia hateten.
Enkuantu PNTL Munisípiu Bobonaro mós atualiza situasaun seguransa no ordem públika jeralmente iha munisípiu Bobonaro la’o ho seguru no kontroladu maske sei iha grupu balu halo provokasaun iha tempu kalan.
Notísia relevante:Janeiru-maiu, PNTL Bobonaro rejista kazu tranzasaun ilegál 61
Jornalista: Sérgio da Cruz
Editór: Evaristo Soares Martins
