BOBONARO, HEADLINE, MUNISÍPIU, SEGURANSA

Janeiru-maiu, PNTL Bobonaro rejista kazu tranzasaun ilegál 61

Janeiru-maiu, PNTL Bobonaro rejista kazu tranzasaun ilegál 61

Membru UPF liuhosi Kompañia Alfa, hamutuk ho F-FDTL halo operasaun la'o-ain iha área Maliana, Munisipiu Bobonaro ne’ebé fronteira besik kedas Indonézia. Imajen/media MI

BOBONARO, 16 maiu 2024 (TATOLI) – Hahú husi fulan-janeiru to’o loron 16 fulan tinan 2024, Polisia Nasional Timor-Leste (PNTL) Munisípiu Bobonaro rejista kazu tranzkasaun ilegál iha liña fronteira hamutuk 61.

Komandante PNTL Munisipiu Bobonaro, Superintedente Xefe Agustino Gomes da Silva, informa, sasan ilegál hirak-ne’e deteta husi servisu hamutuk entre komapañia Alfa Unidade Patrulamentu Fronteira (UPF), Kompañia Delta Batallaun Orden Públika (BOP) no membru komandu Polísia Munisipiu Bobonaro liuhusi atividade patrullamentu intensivu kontrola rútina hodi halo prevensaun no asaun polisiál ne’ebé firme no rigorozu hahú iha fronteira Lele to’o Mota-Ain.

Agustino hahutan, husi atividade ilísitu ne’ebé iha, hahú husi janeiru to’o agora seidauk envolve materiál neʼebé perigu ba nasaun hanesan; kilat, arma branka, amunisaun no narkotika.

Notisia relevante: UPF la tolera sidadaun ne’ebé prátika atividade ilegál iha liña fronteira

Nia esplika, sasán hirak-ne’ebé polísia halo apreensaun mak bebida hanesan cocacola, sprit no fanta.

Nune’e mós sigaru hanesan surya 12 ho tabako depois gazoel no gazolina, sasán hirak-ne’e la’ós ema hala’o ne’e koletivamente.

Nia haktuir, kazu hirak-ne’e dadaun ne’e aprezenta ona ba Ministériu Públiku primeira instánsia Maliana, hodi kontinua prosesu tuir lei kódigu prosesu penál.

“Komandu Munisípiu Polisia Bobonaro iha tinan ne’e ezekuta mandadu detensaun ba arguidu kontra ho prizaun tinan liman na’in-ida, ne’e kazu boot no ezekuta mandatu detensaun arguidu ida ho prizaun alternativa, sira-ne’e kontinua prátika aktu ilísitu ho repetidu, depois la kumpre notifikasaun husi Ministériu Públiku,” Komandante ne’e dehan.

Hafoin submete kazu ne’e ba Ministériu Públiku, Autoridade Polísia Bobonaro kontinua halo komunikasaun ho autór sira hodi konvense sira atubele hapara aktu ilísitu ne’e.

“Buat sira-ne’e mos sai barreira ba membru sira atu ezekuta servisu ne’e ho efetivu tuir espetativa ema barak nia maibé esfoirsu ita halo nafatin, ita halo aprosimasaun ba dioseze ba parókia, husu padre atubele fó-sai ba sarani sira hodi bele garantia seguransa no establidade ba ema hotu-hotu,” Eis komandante UPF ne’e katak.

Superintendete Xefe ne’e hatutan, atu prevene kazu tranzasaun ilegál neʼebé kontinua buras iha liña fronteira TL ho RI, espesialmente iha munisipiu Bobonaro, uza estratéjia sira hanesan kontinua halo koordenasaun ho UPF, BOP, F-FDTL no eskuadra polísia Balibo, Maliana no Lolotoe.

Nia subliña, kamandante eskuadra tolu ne’e mos orienta membru Ofisiál Polísia Suku (OPS), bakbesik-aan beibeik ba suku, atu koordena ho Konsellu Polisiamente Komunitária, lideransa komunitária sira hodi apoia no kontribui atu halo prevensaun atividade ne’e aktu neʼebé sidadaun sira halo krime.

“Ita halo liuhusi patrullamentu, aprosimasaun, komunikasaun, enkontru KPK hodi husu sira -nia apoia, hodi suporta PNTL prevene krime,” nia katak.

Enkuantu postu UPF kompañia Alfa neʼebé kolokadu iha fronteira munisípiu Bobonaro hamutuk 10 bahú husi Lela to’o Batugade.

Notísia relevante: UPF-Satgas TNI organiza patrulla konjunta iha fronteira Haumen-Ana

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!