DILI, 27 Maiu 2025 (TATOLI)–Komisáriu Komisaun Antí Korrupasaun (CAC-sigla portugeza), Rui Pereira dos Santos, hateten peritu hosi nasaun rua, Marshall Island no Bulgária inklui peritu the United Nations Official Document System (UNODS) hahú avalia servisu no esforsu CAC nian inklui institusaun relevante sira seluk kona-ba prevensaun no kombate korrupasaun iha Timor-Leste tuir implementasaun dokumentu husi United Nations Commission Againts Corruption (UNCAC) haruka.
Tuir nia, Timor -Leste hola-parte nu’udár nasaun membru UNCAC, tanba ne’e ho avaliasaun sira-ne’e bele ajuda Timor-Leste atubele hadi’a parte balun ne’ebé presiza hadi’a para mellora liután servisu CAC.
“Ita nu’udár Estadu, ita iha obrigadu atu fó resposta ba ba pergunta 200-resin ne’ebé mak husi nasaun rua halo avaliasaun mai ita ne’e. Se ema husu setór justisa kuandu ita hatán ba sira seidauk klaru, sira husu para ita atu kompleta. Hanesan mós sira orsida husu katak investigasaun CAC seidauk kompletu, entaun ita mós prepara fó resposta inklui mós institusaun seluk mós nune’e,” Rui hateten ba jornalista sira hafoin abertura ba avaliasaun husi nasaun rua inklui UNODS ba Timor-Leste nian kona-ba revizaun ba dokumentu UNCAC, ne’ebé hala’o iha Salaun Nobre MNEK, Praia dos Coqueiros, tersa ne’e.
Nia dehan, avaliasaun ne’ebé nasaun rua inklui UNODS halo ba Timor-Leste ba dokumentu UNCAC nian ne’e sai halo iha loron tolu nia laran, hahú 27-31 2025 no relatóriu avaliasaun ekipa sei publika iha fulan oin.
Notísia relevante: Nasaun rua hamutuk ho UNODS sei avalia implementasaun UNCAC
Iha fatin hanesan, Sekretáriu Jerál Ministériu Negósiu Estrajeiru no Kooperasaun (MNEK), João Freitas Câmara, hateten avaliasaun sira-ne’e importante ba Timor-Leste tanba ho avaliasaun sira-ne’e mak bele hametin liután Timor-Leste nia pozisaun ba kombate korrupasaun tuir konvensaun internasionál UNCAC nian.
Entretantu, Xefe Ekipa UNODC Antí Korrupasaun ba Sudeste Aziátiku, Annika Wythes, informa avaliasaun ne’ebé mak illa Marshall no Bulgária halo ne’e importante ba Timor-Leste (TL) tanba TL hanesan nasaun ne’ebé joven presiza avaliasaun sira hanesan ne’e atu hadi’a di’ak liután servisu instituusaun sira liga ho prevensaun no kombate korrupasaun.
Nune’e mós, Ministru Justisa, Sergio Hornai, tenik Timor-Leste realiza sorumutu importante ida para afirma kompromisu ba luta kombate korrupasaun tuir dokumentu UNCAC kapítulu II ba Medida Preventiva no kapítulu V kona-ba Rekuperasaun Patrimónia.
Nia dehan, Governu hamutuk ho parseiru sira tantu iha nível nasionál no parseria internasionál sira atu hametin nia instituisaun Estadu sira espesialmente hanesan órgaun Komisaun Antí Korrupasaun, ho razaun fundamentál Timor-Leste hanesan nasaun parte ba organizasaun nasaun unida ba medida sira prevensaun no kombate korruupsaun.
Timor-Leste nu’udár membru-Estadu parte UNCAC nian iha tinan 2012, iha-ne’ebé kedas hahú implementa UNCAC. Ida-ne’e inklui foku ida ba polítika lejizlativa sira relasiona ho kriminalizasaun no Supermasaun Lei (Kapítulu III) no Kooperasaun Internasionál (Kapítulu IV) no mós pratika di’ak sira hodi kombate korrupsaun.
Iha tinan 2012, Governu TL lansa mós kampaña edukasaun sívika permanente ida hodi hasa’e konxiénsia kona-ba prevene no kombate korrupsaun no mekanizmu sira relatóriu nian.
Jornalista: Natalino Costa
Editór: Xisto Freitas da Piedade
