DILI, 27 Maiu 2025 (TATOLI)-Timor-Leste Coalitions for Education (TLCE), José Monteiro, prefere Konsellu Ministru (KM) deside espesífiku ba suspensaun rekrutamentu ba funsionáriu públiku, tanba desizaun ne’e jerál liu.
“Ha’u akompaña, maibé ha’u lahatene ho detallu kona-ba suspensaun tanba ba ho nível ida-ne’ebé no kategoria ida oinsá”, dehan nia ba TATOLI iha ninia servisu fatin Kaikoli, tersa ne’e.
Tuir nia desizaun KM afeta ba ajenda rekrutamentu husi Ministériu Edukasaun no Ministériu Saúde.
“Tuir ha’u hatene rejime jerál no espesiál ne’e hanesan de’it, diferente mak estatutu no grau profesionál. Ida-ne’e desizaun Konsellu Ministru ne’ebé la’o tuir de’it, atu venkula ka lae, ne’e desizaun ne’ebé ita laiha autoridade tanba ne’e lei. Konsellu Ministru hanesan órgaun ne’ebé superiór liu”, nia dehan.
Enkuantu rekrutamentu iha ME, Ministra Edukasaun, Dulce de Jesus Soares, hatete halo rekrutamentu ba manorin sira ba vaga sekundáriu ne’e ho rejime espesiál.
Notísia relevante: ME halo rekrutamentu ba manorin sira ho rejime espesiál
“Suspensaun ba rekrutamentu funsionáriu publiku ne’e la prejudika vaga sekundáriu nian, tanba ita halo rekrutamentu espesiál no ida-ne’e la’o nafatin, tanba profesor la’ós rejime jerál, maibé profesor rejime espesiál”, dehan Ministra.
Nia dehan relasiona ho desizaun Konsellu Ministru ne’ebé hodi halo suspensaun temporáriu ba rekrutamentu funsionáriu públiku foun, ne’e ba funsionáriu sira seluk.
Tanba ne’e mak Ministériu Edukasaun ho Komisaun Funsaun Públika (KFP) fó teste ona, ne’e la prezudika mak teste la’o, karik prezudika teste la la’o. No iha abertura ne’e mós Prezidende Repúblika, José Ramos Horta, partisipa.
Notísia relevante: Governu suspende temporáriu rekrutamentu ba funsionáriu públiku foun
Jornalista : Osória Marques
Editora : Rita Almeida
