DILI, 28 Maiu 2025 (TATOLI) – Bankada opozisaun husi Partidu Libertasaun Populár (PLP) konkorda ho desizaun Governu hodi deporta fujitivu Arnolfo Teves Jr. bá nia rai orijen Filipina.
Xefe Bankada PLP, Maria Angelina Sarmento, dehan kona-ba kazu fujitivu Arnolfo Teves hothotu hatene katak tribunál halo ona dezisaun ba nia kazu, liuliu nia mós husu azilu polítiku iha Timor-Leste.
“Ba kazu ne’e, Timor-Leste hetan protestu maka’as mós husi deputadu sira iha Filipina nian, ne’ebé dehan katak Arnolfo Teves Jr. ne’e nia kazu ne’e laiha ligasaun ho asuntu terorizmu. Maibé, nia kazu ne’e ligadu ho asasinatu ne’ebé akontese iha tinan hirak liubá ne’ebé nia mak komete ho ninia adversáriu polítiku ida ne’ebé tenke hakotu nia vida”, dehan iha Parlamentu, ohin.
Ba kazu ne’e, vítima nia família lori ona prosesu ba tribunál no politikamente Estadu Filipina husu atu Timor-Leste deporta fujitivu ne’e ba nia rai, tanba tenke hasoru justisa ne’ebé família vítima hato’o hela keixa ba tribunál.
Nia esplika bazeia ba deklarasaun deputadu sira husi Filipina katak bainhira Arnolfo fila bá nia rai sei la hetan pena morte, maibé tenke responsabiliza ba atu asasinatu ne’ebé nia halo ba nia adversáriu, nune’e nia bele hetan pena no la’ós iha Timor-Leste.
“Tanba ne’e, iha eventu ka okaziaun barak hanesan ASEAN People Forum, bainhira ha’u hasoru malu ho deputadu sira husi Filipina, sira protesta maka’as ba Timor-Leste ninia pozisaun hodi mantein Sr. Arnolfo Teves”, Maria Angelina haktuir.
Nia salienta deputadu sira Filipina dehan kazu ne’ebé Arnolfo komete ne’e liga ho asasinatu, maibé ema ezajera tiha nia kazu sai hanesan terorizmu. Hodi esplika katak pena morte ne’ebé Filipina iha ba terorizmu nian.
“Maibé, nia kazu ne’e puramente krime asasinatu ba nia adversáriu. Ita lori nia fila di’ak liután. Ne’e oportunidade di’ak atu Filipina hametin ninia desizaun apoia Timor-Leste ninia adezaun ba ASEAN, tanba nia hanesan fujitivu, kuandu ita kaer metin nia sei hetan difikuldade atu Filipina fó apoiu ba Timor-Leste”, dehan.
Maria Angelina mós komenta relasiona ho vídeo ne’ebé espalla iha rede sosiál katak fujitivu Arnolfo Teves dehan laiha mandadu kapturasun husi Tribunál atu kaer nia iha dalan.
“Maibé, será que nia halo buat ruma mak viola regra kona-ba termu identidade rezidénsia TIR ne’ebé nia hetan? Karik ida-ne’e mak obriga entidade sira hodi kaer nia, ha’u la hatene. Maibé, hanesan deputadu haree katak se law enforcement iha Timor-Leste nomós tanba ita la kle’ur tan hetan ofisialmente sai membru ASEAN ba da-11, entaun atu halo law enforcement ne’e la’ós akontese iha Timor-Leste, maibé ita-nia kompromisu law enforcement tenke hala’o ba nasaun sira ne’ebé membru ASEAN nian. Tanba ne’e mak parte importante ida atu ita idaidak respeita país idaidak ligadu ba kestaun justisa”, dehan.
Jornalista tenta atu entrevista ho Prezidente Komisaun A ne’ebé trata Asuntu Konstitusionál no Justisa, deputadu Patrocínio Fernandes, maibé nia parte lakohi fó komentáriu ho razaun seidauk hetan informasaun klara.
Rekorde katak, iha tersa-feira kalan (27/05) pur volta tuku 20h20, autoridade seguransa kompostu husi Servisu Migrasaun (SM) no Batallaun Orden Públiku (BOP), detein Arnolfo Teves JR iha nia rezidénsia, Metiaut, Dili.
Tuir informasaun ne’ebé Tatoli asesu husi pesoál informadór sekretu katak motivu autoridade seguransa bá foti obrigatoriamente Arnolfo tanba ezekuta desizaun tribunál nian ne’ebé indefere ona pedidu azilu polítiku ne’ebé antes ne’e nia hato’o ba Tribunál basá nia sente persegidu polítiku iha nia rai orijen.
Tuir tribunál, pedidu azilu polítiku ne’e só atribui ba ema iha nia nasaun orijen ne’ebé sente persegidu hanesan situasaun polítika ladi’ak no defende direitu umanu. Enkuantu, sidadaun Arnolfo molok ne’e akuzadu ba krime asasinatu iha nia rai orijen, Filipina. Ho razaun ne’e mak sidadaun ne’e la prienxe kritériu ba azilu polítiku.
Notísia relevante: Advogadu lamenta detein Arnolfo iha edifísiu Servisu Migrasaun
Jornalista: Arminda Fonseca
Editora: Maria Auxiliadora
