Jogu kualifikasaun tasa Ázia AFC 2027, TL sei kontra Maldivas iha Austrália

DILI, 28 Maiu 2025 (TATOLI)—Ekipa selesaun nasionál semana ne’e sei dezloka ba Darwin-Austrália hodi joga kontra ekipa selesaun nasaun Maldivas iha jogu kualifikasaun Tasa Ázia Asian Football Confederation (AFC) 2027.

Notísia Relevante: Tazakistaun manán Timor-Leste 1-0 iha jogu kualifikasaun tasa Ázia 2027

“Jogu entre Timor-Leste versus Maldivas sei realiza iha loron 10 fulan-Juñu tinan ne’e iha nasaun Austrália,” refere nota ne’ebé Agência tatoli asesu husi Federasaun Fuiteból Timor-Leste, kuarta ne’e.

Tuir lista ne’ebé Federasaun Futeból Timor-Leste (FFTL) fó sai katak, jogadór hamutuk 23 mak naran tama ona iha lista selesaun senior nian.

Treinadór prinsipál selesaun nasionál senior, Simón Elissetche sei hili jogadór 18 husi klube lokál no jogadór timoroan 12 husi klube rai-li’ur ho totál hamutuk jogadór 30, maibé sei treinu hamutuk no treinadór ne’e sei hili de’it jogadór ne’ebé di’ak na’in-23 mak partisipa iha jogu referidu.

Jogu Kualifikasaun Tasa Azia AFC 2027 ronde da-tolu, Timor-Leste iha grupu A, ne’ebe hamutuk ho Tajakistan, Maldivas no Filipina.

Iha jogu primeiru Timor-Leste kontra Tazakistaun, iha ne’ebé Timor-Leste sofre ona golu ida no ikus tenke hetan derrota iha Tajakistan nia uma rasik.

Nasaun tolu ne’ebé hamutuk ho Timor-Leste iha grupu A, sira nia klasifikasaun Federation International Football Assosiation (FIFA) aas liu kompara ho Timor-Leste hanesan Tazakistaun nia klasifikasaun FIFA 104, Filipina 150 no Maldivas 162 no Timor-Leste nia klasifikasaun 197.

Jornalista : Hortencio Sanchez

Editór       : Cancio Ximenes