DILI, 28 Maiu 2025 (TATOLI) – Komisaun A ne’ebé trata Asuntu Konstitusionál no Justisa iha Parlamentu Nasionál aprova relatóriu pareser ba proposta lei númeru 13 kona-ba Kódigu Rekupersaun no Insolvénsia.
“Komisaun A halo apresiasaun no aprovasaun ba relatóriu pareser no proposta lei númeru 13 kona-ba Kódigu Rekuperasaun no Insolvénsia ne’ebé halo tiha ona audiénsia iha semana hirak liubá. Ohin, ami hato’o nia pareser hodi submete ba plenária Parlamentu Nasionál”, Prezidente Komisaun A, Patrocínio Fernandes, hateten hafoin reuniaun komisaun.
Nia dehan relatóriu kona-ba aprovasaun ne’e komisaun haruka ba meza Parlamentu Nasionál hodi hein meza sei ajenda atu halo diskusaun iha plenária.
Prezidente komisaun seidauk esplika detallu kona-ba konteúdu relatóriu pareser ho rekomendasaun sira tanba sei halo mós aprezentasaun iha plenária.
Lembra katak, iha loron 24 Abríl 2025, Komisaun A no D (Ekonomia no Dezenvolvimentu), konvida entidade relevante hodi rona sira-nia hanoin relasiona ho proposta-lei númeru 12/VI (1a) Kódigu Rekuperasaun no Insolvénsia.
Instituisaun sira ne’ebé hola-parte iha audiénsia mak Ministru Koordenadór ba Asuntu Ekonómiku, Ministériu Finansa, Ministériu Komérsiu no Indústria, no Ministériu Justisa.
“Lei ne’e pelu menus fó ona konfiansa ba sira atu investe, tanba sira hatene katak iha ona serteza legál para sira investe no sira hatene bainhira iha problema ruma karik, lei ne’e sei regulariza sira-nia situasaun rasik”, Ministru Interiór, Francisco da Costa Guterres, bainhira reprezenta Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, iha Parlamentu.
Ho lakuna jurídika ba dezenvolvimentu ekonómiku, nia dehan objetivu lei ne’e fó seguransa jurídika ba setór privadu no mós investidór sira.
Notísia relevante: PN no Governu hahú diskute proposta lei kódigu rekuperasaun no insolvénsia
Jornalista: Arminda Fonseca
Editora: Maria Auxiliadora
