DILI, 28 Maiu 2025 (TATOLI)–Ministériu Edukasaun liuhusi Departamentu Asaun Sosiál Eskolár no Merenda Eskolár sei hapara hotu Ekipa Jestaun Programa (EJP) merenda eskolar sira iha territóriu nasionál no sei fó kompeténsia ba eskola, grupu komunitáriu no líder suku mak sei jere programa nasionál ne’e.
Xefe Departementu Asaun Sosiál Eskolar no Merenda Eskolár, Belchior Guerra, hateten, Ministériu Edukasaun (ME) entrega ona programa ne’e ba Ministériu Administrasaun Estatál (MAE) hodi prosesa orsamentu sira no fó subsídiu. Agora ME nia papél maka atu halo polítika no monotorizasaun ba implementasaun programa ne’e iha territóriu tomak.
“Programa merenda eskolár daudaun ne’e iha nível munisípiu sira hotu kontinua la’o maibé iha de’it munisípiu Oékusi iha problema mak seidauk la’o tanba númeru konta bankária, entaun iha semana kotuk ha’u ba hasoru sira-nia Diretór Edukasaun, Sekretáriu Asuntu Sosiál RAEOA hodi observa problema ne’ebé akontese no sira iha difikuldade ba númeru konta bankária,” Xefe Departementu informa Ajénsia TATOLI iha edifísiu ME, Vila-Verde, Kuarta ne’e
Notísia relevante : TLCE husu Governu mellora programa merenda eskolár
Munisípiu sira daudaun ne’e implementa programa merenda eskolár liuhusi ekipa jestaun programa ne’ebé eziste hamutuk 202 iha eskola sentrál bázika iha territóriu nasionál, enkuantu Oékusi implementa diretamente jere husi eskola.
Orsamentu ne’ebé iha fahe ba item rua hanesan osan 0,35 sentavus hodi ba sosa alimentasaun no $0,7 sentavus ba administrasaun,ne’ebé fahe ba buat lima hanesan sosa ai, bee, aluga transporte, ekipamentu hodi han (bikan, kanuru sanan, tasu) ikus liu mak subsídiu ba ema sira-ne’ebé tein.
Aleinde ne’e, osan $0,42 sentavus ne’e sei sosa ai-han hanesan foos, modo, ai-fuan no na’an.
“Iha manuál dahuluk no daruak ne’e ami tau lista hahán bandu, ne’ebé referida liu ba hahán sira hanesan deho, ayam potong, sosis, mantolun, maling, sardina lata, biskuite no bebidas sira-ne’ebé kontamina ho gás no masin-midar. Hahán sira-ne’e ami bandu atu fó ba ita-nia oan sira,” nia esplika.
Dalaruma ekipa responsável sira la hare data espira no koziñeira sira la kompreende, tanba ne’e bele estraga fali labarik sira-nia saúde.
“Ministériu Edukasaun hamutuk no Ministériu Saúde hamosu buat ida-ne’e hodi bandu eskola sira fornese ba estudante, oinsá atu asegura labarik sira hodi konsumu ho di’ak katak 75% osan ne’e tenke sosa ai-han lokál. Maibé produtu lokál ne’e menus tebes, liuliu iha tempu bailoro, entaun ami mós identifika iha grupu balun mak komete irregularidade hodi fó ai-han proibida sira ba labarik,” nia katak.
Diresaun Fiskalizasaun iha nível munisipál sira mak presiza kontrola ba implementasaun programa merenda eskolar iha baze, nune’e bele informa ba ME hodi tuun halo monitorizasuan direta bainhira identifika implementadór sira la kumpre durante implementasaun.
Maski nune’e, eskola balun nafatin komete irregularidade, hanesan fornese supermie no ai-han seluk tan, tanba ne’e ME sei halo rekomendasaun ba erru sira hodi hato’o ba Prezidente Autoridade Munisípiu.
“Desizasaun tomak iha PAM nia liman, sira sei prepara karta no relatóriu hodi hato’o ba Prezidente Autoridade. Hanesan foin lalais ne’e ami ba halo monotorizasaun iha eskola sira iha Dili laran no ami hetan difikuldade barak entaun ami halo relatóriu no aprezenta ba iha PAM no diretór fiskalizasaun hodi tuun diretamente ba haree faktu sira-ne’ebé mak akontese iha terrenu,” nia informa.
Jornalista : Alexandra da Costa
Editora : Julia Chatarina
