DILI, 28 Maiu 2025 (TATOLI)—Ekipa husi Sekretaria Estadu Dezenvolvimentu lokál (SEDL), Kuarta ne’e, halo diseminasaun informasaun ba funsionáriu husi Autoridade Munisípiu Dili kona-ba pilár haat hodi responde ba planu dezenvolvimentu munisipál, bazeia ba diploma miniateriál nú.72/2024 10 Dezembru kona-ba ‘prosedimentu formulasaun aprovasaun ba planu dezenvolvimentu munispál’.
“Governasaun hirak liubá ne’e ko’alia ona planu estratéjia munisipál Dili ba períodu mandatu ida tuir mai ne’e no daudaun Ministériu Administrasaun Estatál (MAE) liuhusi SEDL ko’alia filafali dezenvolvimentu lokál ho pilár haat,” Prezidente Autoridade Munisípiu (PAM) interinu Dili, António Agosto Guterres, relata ba Ajénsia TATOLI, iha salaun enkontru Autoridade Munisípiu Dili (AMD), Matadoru.
Pilár haat ne’e mak hanesan kapitál sosiál, dezenvolvimentu infraestrutura, dezenvolvimentu ekonómiku no dezenvolvimentu nasionál, ne’ebé sei ajuda priense iha avaliasaun kondisaun mínima ba implementasaun poder lokál no desentralizasaun administrativa.
“Agora kontinua aprezenta matéria sira ne’e iha balun mak priense ho enkuandramentu legál no balun mós laiha, nune’e oinsá atu orienta ita hamosu konseitu di’ak ida ba munsípiu. Tanba ko’alia kona-ba planu dezenvolvimentu munisipál, Dili sai sasukat ba avaliasaun kondisaun mínima iha futuru bainhira sira priense ona rekezitu ba avaliasaun,” PAM interinu tenik.
Notísia relevante : Governu sei elabora planu dezenvolvimentu komunitária no munisipál
Atividade ne’e ho objetivu atu partisipante sira bele hatene planu estratéjiku munisípiu Dili nian, tanba ne’e atividade ohin la’ós partisipa husi ekipa AMD de’it maibé mós husi Administradór postu sira, Diretór ba servisu 19 inklui entidade relevante balun.
“Matéria ida-ne’e atu ko’alia de’it kona-ba kontestu Dili maski munisípiu seluk mós hetan hotu matéria ne’e, maibé ha’u hakarak iha okaziaun ida-ne’e planu dezenvolvimentu munisipál ita tenke define bazeia ba enkuadramentu legál sira,” nia katak.
Bazeia ba ninia objetivu, meta, misaun no vizaun tenke klaru tuir sistematizasaun tanba munisípiu Dili diferente ho munisípiu sira seluk.
“Dili sai sentru ba konsentrasaun tanba ema atu buka moris nune’e mós iha dezenvolvimentu instituisionál, katak instituisaun barak liu iha Dili husi nível inferiór to’o superiór, entaun Dili sai portaun tama no sai ba kapitál,” nia reforsa.
Tanba ne’e elaborasaun no formulasaun ba planu dezenvolvimentu munisípiu Dili nia vizaun ne’e tenke temátiku no programátiku bazeia ba situasaun no kontestu reál Dili.
Jornalista : Alexandra da Costa
Editora : Julia Chatarina
