DILI, 28 Maiu 2025 (TATOLI)–Ministru Juventude Desportu Arte no Kultura (MJDAK), Nelyo Isaac Sarmento, hateten Timor-Leste nia preparativu ba jogu Komunidade Nasaun Sira Ko’alia Lian Portugés (CPLP, sigla portugés) iha faze importante tolu.
Notísia Relevante: MJDAK-Federasaun desportiva ualu diskute prepararivu ba jogu CPLP
“Ita iha faze tolu ne’ebé importante iha preparasaun ita-nian ba jogu CPLP. Ita tenke halo susesu duni jogu ne’e, ita koordena ho Ministériu hotu atu servisu hamutuk,” Ministru Nelyo hateten ba Agência TATOLI liuhusi programa “Entrevista Eskluziva” ho topiku “Preparasaun ni Importánsia Jogu CPLP iha Timor-Leste” iha estúdiu TATOLI, iha Faról, kuarta ne’e.
Faze tolu ne’ebé Governu prepara mak hanesan, faze dahuluk, interna Timor-Leste nian iha liña ministeriál sira ho rekursu ne’ebé iha atu servisu hamutuk sai ekipa ida-ne’ebé forte ba realizasaun atividade.
Faze daruak, prepara ba festa realizasaun ho kondisaun hotu ne’ebé relasaun ba iha orsamentu, rekursu sira ba infraestrutura no fasilidade ne’ebé atu utiliza ba jogu referidu.
Faze datoluk, iha ezekusaun ba jogu ne’ebé tuir kalendariu sei hahú loron 17-27 fulan-Jullu tinan 2025.
“Kona-ba preparasaun sira Governu utiliza nia kapasidade rasik atu ekipa liña ministeriál sira hanesan Ministeriu Saúde, Ministeriu Interior, Ministeriu Planeamentu Investimentu Estratéjiku, Ministeriu Negósiu Estranjeiru no Kooperasaun atu halo tratamentu ba bainaka sira atu tama mai ho mós Ministeriu Komérsiu Industria atu haree oinsa bele realiza termu feria ruma, inklui Ministeriu Finansas ne’ebé iha responsabilidade maásimu ba osan,” Ministeru ne’e tenik.
Nia hatutan, daudaun ne’em Governu tama ona iha faze ezekusaun tanba hela fulan ida tan tenke hala’o jogu CPLP iha Timor-Leste.
“Ha’u bele dehan, intermu komisaun nia preparasaun ba atleta nasionál, maibé ita iha ona 80% ba preparasaun. Kona-ba orsamentu ita laiha ona problema loos hotu ona tanba uluk ita preve ona millaun $3.7 aseguradu ba ida-ne’e. Maibé, ha’u fiar katak ho apoiu másimu husi patrosinadór sira ba atividade ne’e. Ita sei la gasta osan ne’e hotu, ita-nia polítika mak ne’e. Ita iha osan ita tenke ezekuta ho didi’ak no poupansa ho rigór tuir kondisaun ita-nian,” nia dehan.
Notísia Relevante: Jogu CPLP, MS prepara ambulánsia sanulu-resin
Jornalista : Hortencio Sanchez
Editór : Cancio Ximenes
