DILI, 02 Maiu 2025 (TATOLI)—Ministru Juventude Desportu Arte no Kultura (MJDAK), Nelyo Isaac Sarmento, sesta ne’e, hasoru malu ho Federasaun desportiva sia (9) ne’ebé preparadu ba jogu Komunidade Nasaun Sira Ko’alia Lian Portugés (CPLP-sigla portugés), hodi diskute kona-ba preparativu sira ba jogu referidu iha edifisiu MJDAK Lecidere, Dili.
“Ita hala’o reuniaun téknika ida ho federasaun ualu ne’ebé preparadu ona ba jogu CPLP nian. Iha reuniaun ne’e ita ko’alia liu kona-ba preparasaun, oinsá konsentra atleta sira iha sentru treinamentu,” Ministru Nelyo Isaac hateten ba jornalista sira hafoin reuniaun ramata.
Nia dehan, Governu ho federasaun sira konkorda malu ona atu hatama hotu atleta sira iha sentru treinamentu antes jogu hahú iha fulan-Jullu mai ne’e.
“Ita tenke hatama hotu atleta sira iha fatin ida liuliu iha sentru treinamentu, atu sira bele iha preparasaun di’ak ba jogu CPLP nian. Durante ne’e ita tarde uitoan iha preparasaun ba training center (TC) tanba ita iha hela prosesu ba akizisaun ba ekipamentu no matéria sira-ne’ebé sira atu uza ba. Iha prosesu atraza uitoan, ita labele hein beibeik maibé iha loron10 fulan-Maiu atleta hotu tenke tama ona iha sentru treinamentu, ami ho Federasaun sira konkorda malu ona,” Nelyo tenik.
Antigu Sekretáriu Estadu Komunikasaun Sosiál (SEKOMS) ne’e hatutan, sentru treinamentu ladun sufisiente no maiória atleta sira konsentra hamutuk iha Ótel Ramelau ne’ebé MJDAK prepara ona ba atleta sira.
Durante atleta sira iha Ótel konsentra liu ba treinamentu, sei iha hahan nutritivu ba sira no sei kontrolu másimu husi ekipa médiku sira.
“Atleta husi modalidade ualu ne’ebé atu joga iha jogu CPLP ne’e hamutuk 101, maibé sira agora atu konsentra hamutuk iha Ótel halo preparasaun ne’e liuhusi númeru ne’ebé ha’u temi. Tanba, durante preparasaun sei iha kompetisaun entre sira ho sira, balun hetan aleiza, ita tenke iha balun substitui kedan. Ne’e mak ita hatama atleta ba konsentra iha Ótel ne’e liu 101 ne’e,” nia dehan.
Modalidade sia (9) ne’ebé sei kompete iha jogu CPLP mak Atletizmu, Atletizmu Paralìmpiku Futeból, Basketból, Voleiból Praia, Xadres, Karate-do, Taekwondo no Tenis Kampu
Jornalista : Hortencio Sanchez
Editór : Cancio Ximenes
