DILI, 28 Maiu 2025 (TATOLI)—Timor-Leste selebra desizaun istóriku ba admisaun Timor-Leste nu’udár membru Asosiasaun Nasaun Sudeste Aziatiku(ASEAN) ba da-11 hodi realiza Coctail informál ida ba Embaixadór sira ASEAN nian, iha Palásiu Prezidensiál Nicolau Lobato, Bairru Pite, Dili, kuarta (28 Maiu 2025) ne’e.
Notísia Relevante: TL sei hetan benefísiu barak bainhira sai ona membru plenu ASEAN
Selebrasaun ne’e realiza hafoin Deklarasaun importante husi Prezidente ASEAN nian ne’ebé fó sai iha Simeira ASEAN ba da-46 iha Kuala Lumpur, Malázia, iha loron 26-27 fulan-Maiu tinan 2025, ne’ebé anunsiu ofisialmente desizaun koletiva Líder ASEAN sira hodi admite Timor-Leste nu’udár Estadu-membru organizasaun nian ba da-11.
Adezaun kompletu sei formaliza iha Simeira ASEAN ba da-47 ne’ebé programadu ona ba fulan-Outubru 2025.
Realizasaun ida-ne’e reprezenta kulminasaun dékada lima liuhusi empeñamentu diplomátiku, hahú ho Prezidente Ramos Horta nia diskusaun inisiál ho Ministru Negósiu Estranjeiru Indonézia nian, Sr. Adam Malik, iha Jakarta iha tinan 1974, no formaliza liuhusi karta intensaun Timor-Leste nian atu adere ba ASEAN iha tinan 2011.
“Admisaun ne’e reprezenta konkretizasaun mehi ida-ne’ebé hahú liu tinan 50 liubá no no reflete dedikasaun metin husi líder timoroan sira, molok no agora, ne’ebé fiar ba vizaun ASEAN nian. Ohin, ita selebra la’ós de’it ita-nia admisaun maibé ita-nia kompromisu atu serbisu makaas liután, bainhira ita prepara atu kontribui ba komunidade ASEAN nia prosperidade komún no estabilidade rejionál,” Horta tenik iha nia diskursu.
Iha serimónia ne’e, Prezidente Repúblika, José Ramos Horta mós kondekora Kolár Orden Timor-Leste ne’ebé prestijiozu ba Embaixadór Extraordináriu no Plenipotentsiáriu Brunei Darussalam mai Timor-Leste, Wan Hadfi Lutfan bin Haji Abdul Latif, nu’udar rekoñesimentu ba ninia servisu diplomátiku esepsionál dezde aprezenta karta kredensiál iha loron 15 fulan-Jullu 2020.
Iha Embaixadór Wan Hadfi nia mandatu, relasaun bilateral entre Timor-Leste ho Brunei Darussalam hetan progresu ne’ebé laiha presedente liuhusi vizita Estadu resíproku entre Sua Majestade Sultan Brunei nian ho Prezidente Ramos Horta, interkámbiu ministeriál estratéjiku sira no asinatura akordu importante sira-ne’ebé kobre servisu aéreu, rekrutamentu trabalhadór, no ezensaun vistu.
Realizasaun notável sira durante nia mandatu inklui reforsa kooperasaun iha ensinu superiór atraves projetu revizaun polítika TVET SEAMEO VOCTECH nian, kolaborasaun kuidadu saúde nian ne’ebé rezulta iha akreditasaun provizóriu ba Sentru Médiku Dili, habelar parseria setór privadu nian ne’ebé aumenta ne’ebé lidera husi kompañia sira hanesan Daikyo Industrial Gas, no partisipasaun inaugural Timor-Leste nian iha Konsellu Negosiu BIMP-EAGA.
“Embaixadór Wan Hadfi Lutfan exemplifika tradisaun diplomasia ne’ebé di’ak-liu husi nia servisu dedikadu hodi hametin ligasaun entre Timor-Leste ho Brunei Darussalam. Nia esforsu sira iha tinan rua ne’e kria ona fundasaun ba kooperasaun ne’ebé sei benefisia ita-nia povu rua ba jerasaun sira tuir mai,” Horta tenik.
Prezidente Ramos Horta hato’o agradesimentu profundu ba Estadu-membru ASEAN hotu-hotu ba sira-nia solidariedade no apoiu ne’ebé metin durante jornada adezaun Timor-Leste nian, no mós ba parseiru dezenvolvimentu sira ba sira-nia kompromisu kontínua.
Timor-Leste agora prontu atu asume nia responsabilidade tomak nu’udar membru ASEAN no kontribui ho signifikativamente atu hodi harii Komunidade ASEAN ne’ebé unidu, pasífiku, no reziliente.
Notísia Relevante: PM Xanana sei halo aprezentasaun iha plenária simeira ASEAN ba dala-46
Jornalista : Hortencio Sanchez
Editór : Cancio Ximenes
