DILI, 28 Maiu 2025 (TATOLI)—Sekretaria Estadu Formasaun Profisionál no Empregu (SEFOPE) simu ona informasaun husi adidu Austrália katak traballadór na’in-rua ne’ebé hakanek husi ninia maluk iha Adelaide, Austrália, foin lalais ne’e, alta ona husi ospitál.
“Sidadaun Timor foin lalais virál tebes iha mídia kona-ba sona-malu ne’e, vítima na’in-rua alta ona,” Sekretáriu Estadu Formasaun Profisionál no Empregu, Rogério de Araújo Mendonça dehan ba jornalista sira, iha SENAI, Bekora, kuarta ne’e.
Nia dehan, suspeitu ne’ebé sona vítima ne’e hein hela investigasaun husi Polísia Austrália, bele bá prizaun no bele mós deporta mai Timor-Leste.
Notísia relevante: Governu TL husu deskulpa ba problema ne’ebé timoroan sira komete iha Austrália
Nia realsa katak SEFOPE lakohi mosu tan problema hanesan ne’e iha futuru.
“Nu’udár membru Governu, bainhira atu husik traballadór timoroan sira atu bá serbisu iha rai-li’ur, fó mensajen ba sira oinsá sira disiplina nohalo serbisu tuir de’it kontratu ne’ebé iha,” nia informa.
Antes ne’e, Sekretáriu Estadu Formasaun Profisionál no Empregu husu ona deskulpa ba problema ne’ebé timoroan sira komete iha Ausrália.
Jornalista: Felicidade Ximenes
Editór: Xisto Freitas da Piedade
