DILI, 23 Maiu 2025 (TATOLI)—Governu Timor-Leste (TL) liuhosi Sekretaria Estadu Asuntu Formasaun Profisionál no Empregu (SEFOPE), husu deskulpa ba Governu Austrália relasiona ho traballadór timoroan ida iha Adelaide, Austrália, ne’ebé hakanek (sona) nia maluk traballadór na’in-rua.
“Governu TL liuhosi SEFOPE husu deskulpa ba Governu Austrália, relasiona ho akontesimentu ne’ebé akontese horisehik (22/05) tuku 15:30 oras Adelaide, Austrália. Tanba dezde 2012 to’o 2025, foin primeiravéz traballadór mobilidade traballu ida komete krime,” Sekretáriu Estadu Formasaun Profisionál no Empregu, Rogério de Araújo Mendonça, hateten ba jornalisa sira, iha Timor Plaza, kinta ne’e.
Nia hatutan, informasaun ne’ebé publikadu ona husi mídia sira iha Austrália katak vítima na’in-rua evakuada ona bá Hospital Royal Adelaide iha Austrália.
“Informasaun ne’ebé ami hetan mak ne’e, vítima na’in-rua ne’e lahó kondisaun krítika, maibé ho kondisaun di’ak. Ita hein katak iha prosesu tratamentu traballadór na’in-rua ne’e bele fila ona bá uma,” nia haktuir.
Rogério espera katak ho akontesimentu ne’e sei la fó impaktu ba kooperasaun programa mobilidade traballadór entre Timor-Leste ho Austrália.
“Hein katak ho problema ne’ebé iha-ne’e sei la sai obstákulu ba Governu Timor-Leste atu kontinua programa mobilidade traballadór,” nia dehan.
Nia informa, hafoin akontesimentu, Embaixada Timor-Leste iha Canberra, Austrália, informa ba SEFOPE katak akontesimentu ne’e akontese tanba relasiona ho vítima na’in-rua xave (taka) odamatan husi li’ur hodi husik hela suspeitu iha kuartu laran.
“Kazu ne’e oras ne’e daudaun iha prosesu investigasaun husi polísia Austrália, no hafoin investigasaun polísia nian ramata, ami sei informa ba públiku kona-ba motivu kle’an husi akontesimentu ne’e,” Rogério tenik.
Governante ne’e realsa katak hafoin investigasaun, SEFOPE sei husu ba Governu Austrália atu deporta autór sira-ne’e mai TL no vítima na’in-rua ne’e sei fila bá servisu hanesan baibain iha Austrália, no husu mós ba traballadór hotu iha Austrália no Koreia Súl atu labele komete krime hanesan saida mak akontese ne’e.
Jornalista: Felicidade Ximenes
Editór: Xisto Freitas da Piedade
