DILI, 28 Maiu 2025 (TATOLI)-Universidade Nasionál Timor Lorosa’e (UNTL) liuhusi Vise Reitór ba asuntu Akadémika no Garantia Kualidade, Samuel Freitas, hatete sei gradua finalista 1.700 iha fulan-Jullu tinan ne’e.
“Ami rekolla informasaun kona-ba númeru estudante to’o agora hamutuk 1.700, husi fakuldade 10 no barak liu mak FEAH (fakuldade edukasaun arte no umanidade)”, dehan nia iha ninia knaar fatin Kaikoli, kuarta ne’e.
Vise-Reitór hatutan data mak seidauk define tanba hein prosesu verifikasaun husi Ministériu Ensinu Superiór Siénsia no Kultura (MESSK).
“Parte UNTL nian, normalmente haree ba hatais sira-ne’e maibé ita preparadu, bainhira konklui verifikasaun mak deside data no hala’o de’it ona graduasaun”, nia dehan.
Nune’e Vise-Reitór espera finalista sai ho koñesimentu no kompeténsia hodi kontribui ba dezenvolvimentu Nasaun ne’e nian.
“Normalmente nu’udar estudante eskola iha universidade to’o ikus halo graduasaun mak dahuluk halo reflesaun, agradese ba vida tomak no agradese ba sé sé ne’e ita mak hatene. Depois kompromete ba sosiedade katak sai ho koñesimentu, kompeténsia atu bele ajuda Nasaun. Sai fiar an katak iha kompeténsia ba servisu kontribui ho di’ak ba buat saida mak ita iha”, dehan nia.
Serimónia graduasaun ne’e dei hala’o iha Sentru Konvensaun Dili (CCD-sigla portugés), no tanba tuir númeru finalista ne’ebé iha no barak liu, presiza fatin luan no boot hodi bele akomoda ema 1.700.
Husi totál 1.700 ne’e kompostu husi Fakuldade Agrikultura iha 138, Fakuldade Enjenária Siénsia Teknolojia iha 221, Fakuldade Edukasaun Arte Umanidade iha 552, Fakuldade Medisina Siénsia Saúde iha 320.
Fakuldade Ekonómia no Jestaun iha 157, Fakuldade Direitu 32, Fakuldade Siénsia Sosiál iha 180, Fakuldade Filozofia Siénsia Umana iha 30, Fakuldade Siénsia Ezata iha ualu no Fakuldade Turizmu Arte Indústria Kriativa Kulturál iha 46, inklui Pós-Graduadu no Mestradu hamutuk 16.
Notísia relevante: UNTL gradua estudante finalista 2.195
Jornalista : Osória Marques
Editora : Rita Almeida
