DILI, 29 Maiu 2025 (TATOLI) – Governu aprova ohin projetu dekretu-lei kona-ba Orgánika Servisu Nasionál Intelijénsia Estratéjiku (SNIE) nian.
Projetu ne’e aprezenta husi Ministru Prezidénsia Konsellu Ministru, Agio Pereira, no husi Diretór-Jerál Servisu Nasionál Intelijénsia, Longuinhos Monteiro.
Tuir nota husi Governu, diploma ida-ne’e bainhira tama iha vigór, sei revoga dekretu-lei númeru 3/2009, loron 15 fulan-Janeiru, ne’ebé kria ona Servisu Nasionál Intelijénsia (SNI) anteriór, ho objetivu atu reforsa kapasidade Estadu nian hodi hatán ba ameasa sira ne’ebé kompleksa no foun, liuliu aktu terrorizmu, sabotajen, espionajen, krime organizadu transnasionál, ameasa ba infraestrutura Estadu nian ne’ebé importante no siberseguransa.
SNIE ne’e nu’udar servisu personalizadu Estadu nian ne’ebé asume responsabilidade ba produsaun no avaliasaun intelijénsia estratéjika no ba ezersísiu funsaun koordenasaun no supervizaun komunidade intelijénsia nasionál, hodi garante aproximasaun ida ne’ebé integradu no efisiente iha área seguransa nasionál.
Dokumentu ne’e mós hateten entre inovasaun prinsipál sira ne’ebé introdús husi diploma foun ne’e maka kriasaun ba estrutura espesializada, hanesan Diresaun Nasionál Seguransa Sibernétika no Postu Integradu Jestaun Fronteira, reforsu ba protesaun dadus no kompartimentasaun informasaun, ho regra espesífika ba funsionamentu Sentru Prosesamentu Dadus nian, no previzaun kona-ba atuasaun limitada, maibé legalmente admisivel, iha situasaun flagrante delitu ka perigu atrazu nian, tuir lejizlasaun penál no prosesuál penál ne’ebé vigora.
“Ho reforma ba instituisaun ida-ne’e, Governu reafirma ninia kompromisu ba konsolidasaun Estadu Direitu, defeza soberania nasionál no modernizasaun instrumentu seguransa estratéjika Timor-Leste nian, tuir padraun internasionál no ezijénsias kontestu atuál nian”, dehan.
Notisía relevante: https://tatoli.tl/2023/04/05/governu-aprova-estatutu-pesoal-servisu-nasional-intelejensia/
Jornalista: Arminda Fonseca
Editora: Maria Auxiliadora
