DILI, 29 Maiu (TATOLI)-Koordenadór Servisu Tékniku ba Operasaun Fundu Dezenvolvimentu Kapitál Umanu (FDCH, sigla portugés), Atanásio Soares, informa Timoroan na’in-hitu preparadu ona atu kontinua estudu iha Japaun tinan ne’e.
Nia dehan daudaun ne’e sira na’in hitu tuir hela formasaun durante fulan tolu hahú Maiu to’o Jullu no Agostu tinan ne’e desloka ona.
“Agostu mak sira bá, sira tuir hela formasaun bá lian inglés, Japaun no matemátika. Tanba bá iha ne’ebá ne’e tenke hatene área tolu, inglés ne’e tenke hatene, Japaun pelumenus hatene uituan no mós Matemátika”, dehan nia ba TATOLI iha nia knaar fatin Kolmera, kinta ne’e.
Nia dehan, ida-ne’e programa Operating Committee Japan Development Scholarship (Komité operasionál bolsa estudu dezenvolvimentu Japaun nian) ne’ebé kada tinan haruka timoroan na’in hitu.
“Ita prepara rekursu umanu maibé orsamentu ne’e fó husi Governu Japaun liuhusi JICA (Ajénsia Kooperasaun Internasionál Japaun nian). Entaun ita koko ko’alia sira bele tau tan orsamentu rekruta ema ne’e to’o na’in-10”, katak nia.
Atanásio hatutan programa ne’e ba mestradu no na’in-rua ba doutoramentu, foti área ekonómia, enjenária no tékniku.
Projetu ne’e ba Timor-Leste iha inísiu 2019, ne’ebé rekruta no finansia ona bolseiru timoroan 46. Na’in-44 ba programa mestradu no rua ba doutoramentu. To’o Marsu 2025 bolseiru hamutuk 29 mak kompleta ona programa mestradu no fila ona mai Timor-Leste.
Agora daudaun hela de’it bolseiru 15 mak sei estuda iha Hiroshima University. Na’in-hitu programa mestradu no iha Gifu University, na’in-neen mestradu, no na’in-rua doutoramentu ne’ebé dedika hela sira nia án iha faze peskiza.
Husi bolseiru 29 ne’ebé termina no fila ona mai Timor, na’in-17 mak hetan ona promosaun, na’in-ida Diretór Jerál, na’in-hitu Diretór Nasional, no na’in-sia assume kargu nu’udár Xefe Departamentu iha instituisaun Estadu.
Notísia relevante: Timoroan 10 sei hala’o estudu iha Japaun
Jornalista : Osória Marques
Editora : Rita Almeida
