DILI, 20 Marsu 2025 (TATOLI)—Governu Japaun liuhusi Embaixada iha Timor-Leste hili ona joven timoroan na’in-10 hodi hala’o estudu ba lisensiatura no mestradu iha Japaun ba tinan 2025.
Embaixada Japaun iha Timor-Leste ofisialmente hala’o resepsaun halibur alumni Japaun nian hodi simu alumni sira, liuliu ba sira-ne’ebé sei ramata sira-nia estudu iha tinan 2024, no fó despedida ba joven na’in-10 ne’ebé sei ba Japaun iha tinan ne’e, na’in-neen (6) sei foti mestradu no na’in-ida ba lisensiatura.
Bolseiru Elvanio António Fátima da Cruz ne’ebé sei hala’o lisensiatura iha Akademia Defeza Nasionál iha Japaun sente katak ninia aseitasaun ba bolsa estudu ne’e la’ós realizasaun pesoál de’it, maibé nu’udar responsabilidade no kompromisu ne’ebé kle’an atu serbí nasaun ne’e ho dedikasaun, integridade no korajen.
“Ha’u agradese tebes ba ha’u-nia nasaun, Timor-Leste iha kolaborasaun ho Japaun, ne’ebé fó oportunidade ida-ne’e mai ha’u atu estuda iha Akademia Defeza Nasionál iha Japaun. Sira-nia enkorajamentu no fiar iha ha’u-nia abilidade sai hanesan ha’u-nia forsa hodi ultrapasa dezafiu sira no hakaas-aan ba excelénsia,” Elvanio hateten iha resepsaun halibur antigu alunu sira iha Embaixada Japaun, kuarta (19/03) kalan ne’e.
Nia hateten, forsa loloos iha unidade, kooperasaun no respeitu ba ema seluk tanba razaun ne’e hamutuk ho bolseiru sira seluk, nia hein atu haburas espíritu amizade no apoiu mútuo hodi hakaas-aan ba objetivu atu salvaguarda nasaun nia futuru.
Melisa da Costa, ne’ebé sei estuda iha Universidade Tókyu ba mestradu, rekoñese katak aleinde preparasaun mentál, nu’udar destinatáriu bolseiru, nia tenke tenta aprende kona-ba kultura no lian Japaun atu nune’e nia bele moris hamutuk ho komunidade lokál.
“Ha’u sei aranka iha 01 Abríl 2025 ne’e. Ha’u-nia rekomendasaun ba Governu mak kuota ba oportunidade bolsa estudu hanesan ne’e bele hasa’e, atu nune’e joven sira husi Timor-Leste barak liután iha oportunidade ba estuda iha rai-li’ur,” nia dehan.
Embaixadór Japaun iha Timor-Leste, Tetsuya Kimura, hateten iha ona estudante husi Timor-Leste liu 120 ne’ebé mak estuda ona iha universidade Japaun nian, inklui estudante na’in-33 liuhusi programa Bolsa Estudu Ministériu Edukasaun, Siénsia no Teknolojia Japaun nian.
Iha estudante na’in-17 liuhosi Akademia Defeza Nasionál Japaun nian, estudante na’in-34 liuhosi programa formasaun longu prazu JICA, no estudante na’in-29 liuhosi programa JDS.
Númeru ne’e kontinua aumenta kada tinan no ami hein tebes atu iha alumni barak liután ne’ebé fila-fali hodi hamutuk ho alumni Japaun nian.
“Tinan ida-ne’e, ita iha estudante timoroan na’in-10 mak sei hahú estuda iha universidade Japaun nian. Estudante na’in-tolu (3) sei adere ba programa Bolsa Estudu Ministériu Edukasaun Japaun Siénsia no Teknolojia, estudante na’in-ida (1) sei ba Japaun hodi estuda iha Akademia Defeza Nasional no partisipante JDS na’in-neen (6) sei ba estuda iha Japaun. Aleinde ne’e sei nomeia partisipante formasaun longu prazu JICA foun ne’ebe hahú iha Jullu oin mai,” nia hateten.
Aleinde ne’e, liuhosi programa JENESYS (Japan-East Asia Student and Youth Exchange Network) juventude timoroan liu 1,400 mak vizita ona Japaun dezde 2010.
Iha tinan kotuk, Embaixada haruka timoroan na’in-24 ba Japaun no hein katak interkámbiu entre nasaun rua ne’e sei buras nafatin.
Nia rekoñese katak, konfiansa entre indivíduu sira forma baze ba relasaun bilaterál sira no fiar katak edukasaun, liuliu ensinu superiór, iha papél importante iha konstrusaun nasaun.
“Ha’u realiza katak esperiénsia estuda iha rai-li’ur ho idade joven ne’e folin boot tebes, tanba ha’u rasik estuda iha Universidade Munique iha Alemaña iha tinan 36 liubá, no ha’u nafatin hetan benefísiu hosi esperiénsia ne’e. Ha’u hein katak ita-boot nia esperiénsia estuda iha Japaun sai hanesan rikusoin ida ba ita-boot nia futuru rasik no mós ba Timor-Leste,” nia dehan.
Marka prezensa iha eventu ne’e, antigun Ministru Petróleu no Minerál, Victor da Conceição Soares no alumni sira hotu ne’ebé uluk estuda ka tuir ona formasaun iha Japaun.
Jornalista : Hortencio Sanchez
Editór : Cancio Ximenes
