Komunidade husu MOP fó prioridade ba estrada ligasaun Tapo-Lolotoe
BOBONARU, 29 Maiu 2025 (TATOLI)—Komunidade husu ba Ministériu Obra Públika (MOP) atu fó prioridade mós ba estrada ligasaun husi suku Tapo, postu administrativu Bobonaru ba postu administrativu Loloto’e, tanba kondisaun fíziku atuál a’a grava ona hodi difikulta movimentasaun Transporte liuliu iha tempu udan.
Notísia Relevante: Kondisaun estrada Zulo-il afeta ba folin foos iha Loloto’e sa’e $21
Reprezentante komunidade suku Lontas, Quintiliano Assis de Jesus, relata Governu atuál presiza konsidera estrada ligasaun Tapo ba Loloto’e ne’e, iha Orsamentu Jerál Estádu tinan 2026 tanba Governu anteriór finaliza ona prosesu lubuk ida.
“Iha 2021, iha mandatu Governu Konstitusionál da-ualu (VIII), Vise Ministru Obra Públika ko’alia iha Zinajíu Maliana dehan atu halo ona ami-nia estrade no iha 2022 sukat tia estrda ne’e, konsultan ida mós halo ona dezeñu. Iha 2023 ne’e, Ministru Abel Pires dehan verifikasaun hotu ona hein ba konkursu maibé lahatene agora nia prosesu to’o iha ne’ebé ona no tama ona 2025 maibé ami la rona rezultadu. Tanba ne’e, ami husu Ministériu Obra Públika (MOP) tau prioridade mós ba ami-nia estrada ne’e. Ami Lolotoe ne’e, tinan-tinan terus hela de’it ba estrada ne’e,” Nia informa ba Agência tatoli, iha área Ozo, suku Lontas, kinta ne’e
Estrada hirak ne’e, nai dehan, liuliu iha parte Zulo-il no Ozo iha tempu udan monu-rai ne’e hetan estragus, no Institutu Jestaun Ekipamentu Apoia Dezenvolvimentu Infestraestrutura, Institutu Públiku (IGEADI, I.P), Brigada Maria-Tapo sempre halo normalizasaun maibé la dura.
“Duke ita gasta osan ba normalizasaun di’ak-liu loke projetu foun para halo dala ida, tau alkatraun tiha mak ami bele uza ba-mai kada tinna. It-nia inan-aman mós bele lori sira nia produtu lokál ba merkadu, negosiante sira halo negósiu ne’e mós bele ba sosa sasán iha Dili ho Maliana ho di’ak, atu nune’e atividade ekonomia la’o ho di’ak. Se lae, tempu udan ne’e dalan kotu, buat hotu paradu,” nia hateten.
Aleinde ne’e, reprezentante komunidade Loloto’e, José de Carvalho, reforsa katak Loloto’e iha poténsia barak liuliu iha setór agrikultura, ortikula, turizmu no seluk tan, maibé susar atu promove, tanba kondisaun estrada ladi’ak.
Tanba ne’e, nia rekomenda ba Governu atu iha seriedade hodi rezolve liuhusi halo konstrusaun ka normalizasaun ba Estrada ne’e.
“Ami rona informasaun dehan atu hadi’a estrada ne’e sai baruk de’it, tanba iha tinan 2021 kedas ko’alia no ko’alia maibé la realiza. Se Governu foun mak nafatin ko’alia tan, entaun ami Loloto’e mak nune’e hela de’it. Hanesan karreta ida karik patina iha fatin, tanba postu administrativu sira seluk ne’e estrada di’ak no kaber hotu ona,” nia dehan.
Postu administrativu Loloto’e iha aldeia hamutuk 20, suku hitu (7) ho nia totál populasaun hamutuk 7,695 ho xefe família hamutuk 1,591.
Notísia Relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalista : Sergio da Cruz
Editór : Cancio Ximenes
