DILI, 29 Maiu 2025 (TATOLI) – Konsellu Ministru dezigna Virna Lorença de Carvalho nu’udar vogál efetivu no Timótio de Deus hanesan suplente ba Konsellu Superiór Ministériu Públiku (MP) nian.
Tuir nota husi Governu, nomeasaun ida-ne’e hodi konsidera katak, husi vogál haat, husi Konsellu Superiór Ministériu Públiku, vogál ida no ninia suplente, hetan nomeasaun hosi Governu, entre sidadaun nasionál sira ho méritu rekoñesidu, lisensiadu iha direitu no iha gozu tomak ba sira-nia direitu sivíl no polítiku ne’ebé, iha loron nomeasaun nian, la’ós majistradu judisiál ka majistradu husi Ministériu Públiku.
“Ho konsidera mós katak nomeasaun anteriór sira husi Governu ba Konsellu Superiór Ministériu Públiku remata ona sira-nia mandatu, Governu deside ona nomeia Virna Lorença de Carvalho nu’udar vogál efetivu Konsellu Superiór Ministériu Públiku nian no Timótio de Deus nu’udar vogál suplente Konsellu Superiór Ministériu Públiku nian”, refere nota imprensa ne’e.
Timótio de Deus moris iha loron 16 Janeiru 1974. Hala’o nia estudu ensinu sekundária iha SMU Kolose St.Yosef Balide-Dili, iha loron 01 Agostu 1999 to’o Juñu 2000, hala’o orientasaun espiritualidade iha Semináriu Maiór Fatumeta. Lisensiadu Direitu iha Universitas Widya Mataram Yogyakarta (UWMY)-Indonézia.
Nia mós partisipa formasaun iha Sentru Formasaun Jurídika, hanesan Konsellu Diretivu ba ONG Asisténsia Legál ba Feto no Labarik (ALFeLa). Iha 2016, sai asesór jurídiku no advogadu ba empreza Timor Telecom S.A, iha 2020 sai Konsellu Superiór iha Ministeriu Públiku, Prokuradoria Jerál Repúblika no seluk tan
Jornalista: Arminda Fonseca
Editora: Maria Auxiliadora
