DILI, 29 Maiu 2025 (TATOLI) – Primeiru-Ministru, Xanana Gusmão, halo aprezentasaun ida kona-ba pontu situasaun ba preparasaun Polítika no Planu Asaun Ekonomia Azúl – Promosaun Ekonomia Tasi ida ne’ebé Reziliente no Sustentável iha Timor-Leste (2025–2030).
Tuir nota husi Governu, polítika ida-ne’e ho objetivu atu promove paradigma foun ida ba dezenvolvimentu ekonómiku, bazeia ba utilizasaun sustentavel rekursu tasi nian, no mós hodi kontribui ba hadi’ak kondisaun moris populasaun nian no prezerva ekosistema.
“Ida-ne’e bazeia ba polítika no asaun integrada lubuk ida, ho foku ba tasi, ne’ebé ho intensaun atu apoia dezenvolvimentu ekonómiku no sosiál nasaun nian tuir prátika ambientál sira ne’ebé di’ak, ho maneira ida ne’ebé diversifikadu, sustentavel no inkluzivu, ne’ebé garante ekilíbriu ba temp naruk hosui ekosistema no rekursu tasi nian”, refere dokumentu ne’e.
Lembra katak, iha 14 Maiu, Konsellu Ministru analiza ona aprezentasaun introdutória ida-ne’e. Aleinde ne’e, analiza mós rejime jurídiku prioritáriu sira ne’ebé sei dezenvolve iha ámbitu ba ninia implementasaun.
Konsellu Ministru mós rona aprezentasaun husi primeiru-ministru kona-ba atividade sira ne’ebé prevee ba Semana Mundiál Oseanu nian, ne’ebé sei hala’o husi loron 01 to’o 08 Juñu, nu’udar parte ida husi selebrasaun Loron Mundiál Oseanu nian, ne’ebé komemora kada tinan iha 8 Juñu.
Programa ne’e inklui atividade desportiva, kulturál no sensibilizasaun kona-ba protesaun tasi, ne’ebé sei hala’o iha territóriu nasionál tomak, liuliu munisípiu sira ne’ebé iha tasi.
Notisía relevante: Governu analiza Polítika no Planu Asaun Ekonomia Azúl
Jornalista: Arminda Fonseca
Editora: Maria Auxiliadora
