DILI, 30 Maiu 2025 (TATOLI)—Diresaun Nasionál Transporte Terrestre (DNTT) no Sekretaria Estadu Asuntu Toponímia no Organizasaun Urbanu (SEATOU) monta sinál tránzitu 12 iha fatin estasionamentu Kampung Baru.
Xefe Seksaun Manutensaun ba Sinál estrada DNTT, João Eugênio C. da Silva, hateten, iha sinál tránzitu modelu rua mak ohin monta, labele para no bele para atu hamenus engrafamentu iha fatin referidu tanba dalaruma difikulta ba Ambulánsia sira bainhira tula ema moras husi ospitál Komoro bá Ospitál Nasionál Guido Valadares (HNGV).
“Tanba ne’e Mak DNTT tau sinál tránzitu atu hamenus engrafamentu, sinál sira-ne’e tau iha estrada sorin-sorin, ne’ebé kada estrada tau haat entaun hamutuk iha ualu. Ita mós tau sinál bele para ne’e iha haat, tolu ba karreta no ida ba motorizada,” Xefe Seksaun esplika iha Kampung Baru, Sesta ne’e.
DNTT koordena mós ho Polísia Nasionál Timor-Leste (PNTL) atu halo kontrola ba sinál tránzitu sira hotu, karik komunidade balun mak la kumpre maka kada motorizada ka karreta sei selu multa $45.
“Ita la’ós tau sinál tránzitu iha Kampung Baru de’it maibé sei estabelese iha fatin sira ne’ebé sempre hamosu engrafamentu hanesan Elemloi Delta no seluk tan,” nia informa.
Notísia relevante : SEATOU tinan ne’e prioriza serbisu levantamentu ba alargamentu estrada
Estasionamentu estabelesidu iha 12, kompostu husi tolu ba parrajen karreta, ida ba parrajen motorizada no ualu hanesan sinál labele para (STOP). Estasionamentu sira sei hetan kontrola husi parte Polísia Tránzitu Dili no ekipa Jestaun Merkadu.
Iha sorin seluk, Sekretáriu Estadu Asuntu Toponímia no Organizasaun Urbanu, Germano Santa Brites Dias, hateten, atividade ne’e hanesan kontinuasaun husi enkontru iha fulan-ida liubá, ne’ebé ekipa konjunta serbisu hamutuk ho liña ministeriál sira atu halo preparasaun ba sinál tránzitu iha dirasaun Kampung Baru hahú husi rotunda Prezidente Nikolau Lobatu to’o Klínika Kampung Baru, Komoro.
“Para hamenus no evita engrafamentu iha fatin ne’e, hahú husi dadeer to’o lorokraik tanba dalaruma mós iha oras meudia maluk sira ne’ebé serbisu atu fila bá uma hodi deskansa maibé sempre mosu engrafamentu tanba de’it vendedór sira okupa tama to’o alkatraun nomós transporte sira para la tuir nia fatin,” Sekretáriu Estadu, hato’o.
Biban ne’e, nia husu ba kondotór sira atu kompreende no respeita sinál tránzitu ne’ebé mak DNTT tau ona.
“Ita sei destaka membru sira iha ne’e para bele kontrola, atu nune’e ita hotu bele uza sidade ne’e ho di’ak no tuir nia dalan,” Governante ne’e tenik.
Jornalista : Alexandra da Costa
Editora : Julia Chatarina
