DILI, 30 Maiu 2025 (TATOLI)–Governu liuhusi Sekretaria Estadu Asuntu Toponímia no Organizasaun Urbanu (SEATOU) tinan ne’e tau prioridade ba serbisu levantamentu uma-kain ba alargamentu estrada.
Sekretáriu Estadu Asuntu Toponímia no Organizasaun Urbanu, Germano Santa Brites Dias, haktuir, antes ne’e ekipa responsável halo ona levantamentu uma-kain 100 iha Lorumata, postu Dom Aleixo atu loke estrada públiku iha tinan ida-ne’e.
“Levantamentu dadus ne’e la’o ona no iha fulan hirak liubá SEATOU ho ekipa konsege tama ona área ne’e hodi halo sensibilizasaun, ne’ebé komunidade entuzias ho planu programa Governu nian ne’ebé atu loke estrada hahú husi área CCF tuun bá tasi ibun Embaixada Amérika nian atu evita engrafamentu,” Sekretáriu Estadu, akresenta.
Notísia relevante : Alargamentu estrada no Indemnizasaun: Entre preokupasaun komunidade Bekora – Kuluhun no resposta Governu
Nune’e, daudaun ne’e SEATOU no Ministériu Obra Públika (MOP) sei esforsu hela ba alargamentu estrada iha postu Kristu Rei, BJ Habibie to’o Kuluhun.
“Maibé bainhira progresu ne’e iha ona, entaun ekipa sira sei halo levantamentu ba komunidade nia rikusoin no bainhira tékniku sira identifika ona, entaun komunidade sira prepara-an ba para Governu atu sobu hodi loke estrada foun,” Governante ne’e katak.
Sekretáriu Estadu iha espetativa programa ne’e bele la’o di’ak nune’e tinan oin bele kontinua serbisu intensivu liután.
“Tanba Fatuhada nian ne’e kuaze fulan hira nia laran ona nune’e iha tinan ida-ne’e ita sei hadi’a parte rua iha Fatuhada nomós iha Matadoru. Nune’e, bele evita tiha engrafamentu ida iha Katedrál Vila Verde,” nia tenik.
Governante ne’e nota, bainba ema atu halo movimentu ba sentrál sidade Dili sempre mosu engrafamentu iha parte Lorumata inklui Fatuhada.
“Entaun ita halo ida-ne’e atu karreta sira bele mobiliza liuhusi dalan ne’ebé ita sei halo hodi mosu ba tasi-ibun,” nia hatutan.
Biban ne’e, Germano Santa Brites, agradese tanba estrada Ai-mutin daudaun ho espasu luan no komunidade bele uza ona dalan ne’e ho di’ak.
“Maibé ema hotu mós tenke kuidadu estrada ne’e tanba Governu gasta osan povu nian hodi hadi’a dezenvolvimentu ba povu hodi uza iha futuru. Atu nune’e komunidade ne’ebé hela iha Ailok-laran labele halo movimentu liuhusi Bairru Pité maibé sira bele liuhusi mota-laran no mosu mai iha Matadoru hodi hamenus engarafamentu,” Sekretáriu Estadu, hatutan.
Jornalista : Alexandra da Costa
Editora : Julia Chatarina
