DILI, 30 Maiu 2025 (TATOLI)—Ekipa konjunta Sekretaria Estadu Asuntu Toponímia no Organizasaun Urbanu (SEATOU), Sesta ne’e, muda sai negosiante ne’ebé fa’an sasán okupa espasu públiku iha área Kampung Baru, Komoro, Dom Aleixo.
Sekretáriu Estadu Asuntu Toponímia no Organizasaun Urbanu, Germano Santa Brites Dias, apelu ba negosiante sira atu labele fa’an modo no na’an sira tama to’o estrada laran hodi halo lalar hotu mai hobur.
“Loron tiha, kalan tiha ita mai problema hela de’it ho vendedór sira. Sensibilizasaun ne’e la’o kedas iha tinan 2023 to’o ohin loron no karreta SEATOU sempre tama sai hodi fó avizu no halo kontrola iha fatin sira-ne’ebé ita sente dehan okupa hela espasu públiku, hahú husi postu Dom Aleixo to’o Kristu Rei,” Sekretáriu Estadu informa iha Kampung Baru.
Notísia relevante : SEATOU komprometidu hadi’a no organiza sidade tuir orden
Nia nota, negosiante sira lakohi rona no lakohi fa’an sasán iha fatin ne’ebé prepara ona ba sira iha Merkadu Manleuana.
“Sira ulun to’os, hakarak buka buat ne’ebé lalais no folin, maibé lakohi bá iha merkadu, maski merkadu Manleuana ne’e luan, sira hakarak kontinua fa’an iha fatin ne’e, kuitadu tuur de’it iha alkatraun leten depois kabun moras karik atu halai bá ne’ebé no bee mós laiha,” nia lamenta.
Antes ne’e, Governu prepara fatin iha merkadu Manleuana ba negosiante sira ne’ebé ekipa konjunta muda sai tanba okupa espasu públiku.
“Governu prepara ona kondisaun iha merkadu Manleuana hanesan haris fatin, bee no ahi. Ita husu sira di’ak liu koopera atu kontinua halo negósiu iha merkadu Manleuna. Tanba iha merkadu kotuk Governu prepara ona dezeñu no hein de’it desizaun atu aprova hodi konstrui ona fatin merkadu atu negosiante sira bele kontinua fa’an iha ne’ebá, la’ós mai fa’an fali iha espasu públiku,” Governante ne’e katak.
Biban ne’e, Sekretáriu Estadu husu ba negosiante sira atu kumpre regra ne’ebé antes ne’e fó sai ona.
“Ohin ita mai haree fali negosiante sira sei hamutuk fa’an iha espasu públiku, tanba ne’e mak ita foti hotu sira-nia sasán hanesan modo no na’an tanba sasán sira-ne’e ita konsidera hanesan lixu,” nia hato’o.
Liután, SEATOU sei halo kooperasaun ho Autoridade Inspesaun no Fiskalizasaun Atividade Ekonómika, Institutu Públiku (AIFAESA, I.P) atu haree hahán sira-ne’ebé fa’an iha fatin públiku, liuliu na’an sira tanba laiha kondisaun ijiene.
“Kompradór sira mós tenke evita buat sira-ne’e atu labele afeta ba saúde. Se lixu entaun ita sei lori bá lixeiru Tibar, maibé na’an moris sira-ne’ebé ita halo aprensaun iha dalan hanesan animál moris sira-ne’e ita sei lori bá uma mahon kbiit laek sira,” nia katak.
Ekipa SEATOU antes ne’e hasai ona regra ba negosiante sira, bele halo negósiu iha oras 20:00 kalan no labele okupa to’o estrada públiku ka fa’an de’it iha loja sira-nia kotuk, maibé, negosiante kontinua fa’an la tuir regra, tanba ne’e ekipa ho obrigatóriu tenke foti hotu sasán sira-ne’ebé negosiante sira fa’an (modo no na’an) inklui meza sira ne’e hotu hodi tula ba lixeiru Tibar.
Aleinde ne’e, SEATOU halo koordenasaun ho Diresaun Nasionál Transporte Terrestre (DNTT) hodi monta sinál tránzitu iha Kampung Baru atu evita mós negosiante sira kontinua okupa espasu públiku hodi halo foer estrada, baleta no hamosu engrafamentu.
Jornalista : Alexandra da Costa
Editora : Julia Chatarina
