Ekipa Selesaun Nasionál Timor-Leste aranka ona ba Austrália
DILI, 30 Maiu 2025 (TATOLI)—Ekipa Selesaun Nasional Timor-Leste aranka ona ba Austrália hodi halo preparasaun ba jogu Kualifikasaun Tasa Ázia AFC 2027 ronde datoluk, ne’ebe Timor-Leste sei jogu ba daruak nian kontra nasaun Maldivas iha loron 10 fulan-Juñu 2025 iha Darwin-Austrália.
Notísia Relevante: Jogu kualifikasaun tasa Ázia AFC 2027, TL sei kontra Maldivas iha Austrália
Ekipa Lafaek dezloka ba Austrália ho aviaun AirNorth sesta (30 Maiu) dadeer ne’e maizumenus iha tuku 07h00 oras Timor-Leste.
“Jogadór Selesaun Nasional Timor-Leste ema na’in-18 ho ofisiál sira hala’o ona viajen ba Austrália atu ba hamutuk ho jogadór timoroan na’in-12 ne’ebe joga hela ba Klube iha rai-li’ur hodi hala’o preparasaun treinu hamutuk antes joga hasoru Maldivas,” Adjuntu Sekretáriu Jerál Federasaun Futeból Timor-Leste (FFTL), Fernando Baptista, hateten ba Agência Tatoli, liuhusi WhataApp, ohin,
Jogu Kualifikasaun Tasa Ásia AFC 2027 ronde datoluk ne’e, Timor-Leste iha grupu A ne’ebé hamutuk ho Tazakistaun, Maldivas no Filipina.
Antes atu aranka, jogadór sira hala’o vizita ba mahein FFTL, São João Bosco antes atu aranka ba Austrália hodi partisipa jogu referidu.
Nasaun tolu ne’ebé Timor-Leste kontra iha jogu kualifikasaun ne’e ho klasifikasaun FIFA aas liu kompara ho Timor-Leste. Tazakistaun iha fatin 104, Filipina iha fatin 150, Maldivas iha fatin 162 no Timor-Leste iha fatin 197.
Jornalista : Hortencio Sanchez
Editór : Cancio Ximenes
