DILI, 30 Maiu 2025 (TATOLI)–Gabinete Apoiu Sosiedade Sivíl (GASC, sigla portuges) foin lalais ne’e, asina akordu ho sosiedade sivíl na’in-21 ba fazedaruak, ho totál orsamentu millaun $2,2, ne’ebé sei implementa programa iha aspetu umanitária, edukasaun sívika, empoderamentu komunitária no ligasaun esterna.
Implementasaun programa sira hahú iha fulan-juñu no termina iha loron 31 Dezembru 2025.
Koordenadór GASC, Joaquim da Costa Freitas, hato’o parabéns ba organizasaun sira ne’ebé konsege pasa iha selesaun proposta.
“Iha prosesu naruk ne’ebé mais difísil iha tinan-ne’e maka mais difísil tanba organizasaun ne’ebé maka parseiru balun la hatudu komportamentu ne’ebé di’ak no siratenke elimina, Gabinete Apoiu Sosiedade Sivíl tenke aplika rekezitu foun ne’ebé ezije 30% ba kustu administrativa ba organizasaun no 70% tenke iha grupu alvu,” Koordenadór GASC hato’o iha salaun enkontru, Palásiu Governu.
Notísia relevante : CET entrega relatóriu implementasaun programa 2024 ba GASC
Nia dehan, kondisaun ne’e obriga benefisiáriu sira atu halo ezersísiu ba planu orsamentu tuir rekezitu sira.
Iha sorin seluk, Diretór Ezekutivu Fórum Organizasaun Naun Governamentál Timor-Leste (FONGTIL), Valentin Pinto, hato’o apresiasaun boot ba kompromisu sira ne’ebé Governu liuhusi GASC oferese atubele kontinua serbisu hamutuk liuhusi polítika parseria
“Ami mós hanoin katak, tinan ida-ne’e iha dinámika oituan ne’ebéla’o maka’as no kuaze besik proposta 300 ne’ebé submete mai iha ne’e, ita tais didi’ak no balun la hetan oportunidade maibéla’ós tanba laiha kapasidade hodi hakerek ita-nia proposta sira ka ita la tuir rekezitu ne’ebé GASC propoin, maibé haree ba prioridade iha tinan ne’e, ne’ebé tenke fó ba proposta ne’ebé tuir prioridade refere,” nia akresenta.
Diretór katak, karik kontratu ne’e finaliza no programa hirak ne’e iha balun mak la konsege implementa hotu maka sei kontinua fali proposta iha tinan oin tanba orsamentu ne’ebé atribui fahe ba 50%, enkuantu orsamentu ne’ebé la konsege uza hotu sei entrega fali ba Governu.
“Entaun ha’u konvida parte sira hotu tenke tau ba hanoin no hanesan kultura ida katak tama iha kompetisaun, balun liu no balun tenke hela, no ba organizasaun sira ne’ebé pasa hodi halo duni serbisu didi’ak tuir proposta ne’ebé iha,” nia fó hanoin.
Antes ne’e asina akordu ba etapa dahuluk ho sosiedade sivíl hamutuk na’in-35 husi munisípiu no nasionál, husi proposta ne’ebé tama 56.
Jornalista : Alexadra da Costa
Editora : Julia Chatarina
