BAUKAU, 29 Maiu 2025 (TATOLI)—Projetu manutensaun estrada diresaun Rotunda Vila Nova to’o Nagardjo ho totál kilómetru 3,5 atualmente la kontinua manutensaun tanba tempu besik sei implementa projetu foun reabilitasaun.
Diretór Kompañia Roman Grigo, Unip. Lda, Estevão Paulo Sarmento, esplika projetu referidu seidauk finaliza maibé Autoridade Administrasaun Munisipál (AAM) liuhosi Serbisu Munisipál Obra Públika deside hapara tanba relaisona ho projetu foun reabilitasaun estrada urbana ne’ebé sei inklui mós estrada referida.
“Obra Públika Baukau fó-sai karta haruka para lai, tanba área urbana kompañia atu hahú halo serbisu (reabilita) ona, tanba nee ami para,” Estevão dehan ba TATOLI iha Vila Nova, Baukau, kinta ne’e.
Mezmu nune’e, parte autoridade orienta atu kontinua halo manutensaun ba estrada iha área seluk hanesan diresaun ba merkadu Tuanau atu finaliza nune’e bele fasilita movimentu transporte públiku.
Iha fatin ketak, Diretór Serbisu Munisipál Obra Públiku Baukau, Agostinho Ximenes, hateten estrada referida halo manutensaun ho tipu cór nune’e deside hapara maibé sei indika fali lokál projetu seluk tanba tempu besik estrada referida sei halo reabilitasaun.
“Ita haree ba nia kontratu ne’e atu ramata, más depende ba nasionál. Ita laiha kompeténsia atu hapara,” Agostinho argumenta.
Antes ne’e, Obra Públika Baukau kontinua husu kompañia responsável atu aselera serbisu iha terrenu hanesan ateru no cór kuak sira liuliu subida iha diresaun rotunda Vila Nova ba merkadu Tuanau inkluindu to’o Nagardjo ho distánsia kilómetru 3,5.
Entretantu, Kompañia Roman Grigo Unipessoal. Lda mak responsável ba manutensaun estrada urbana Baukau Vila, totál orsamentu rihun $600 ho totál distánsia hamutuk kilómetru 23.
Akordu ne’ebé asina iha fulan-Maiu 2023 no sei termina iha fulan-Juñu tinan-ne’e ne’ebé ho tipu serbisu rutina manutensaun liuhosi baze performasaun lokaliza iha Baukau Vila.
Jornalista: Natalino Belo
Editór: Xisto Freitas da Piedade
