DILI, 30 Maiu 2025 (TATOLI)—Xanana Reading Room (Sala Leitura Xanana Gusmão) hamutuk ho Ministériu Edukasaun (ME) no parseiru sira lansa programa Prémiu Hakbiit Juventude ba Dezenvolvimentu, ne’ebé harii husi Jestór programa, Kay Olo Sword Gusmão.
Programa ne’e hanesan edukasaun la formál ne’ebé define pilar haat hanesan, abilidade, voluntáriu, rekresaun psikolojia no jornada adventura. Programa ne’e loke ofisiál ba juventude sira-ne’ebé iha esperansa hakarak hasa’e sira-nia kapasidade ba dezenvolvimentu.
Minstra Edukasaun, Dulce de Jesus Soares, hateten, iha programa komplementár neʼebé bele ajuda motiva estudante sira atu apreende no foti asaun independente, ne’ebé ikus mai sei kontribui ho pozitivu hodi hasa’e kualidade husi eskola sira no permite ME atu serbí estudante ida-idak nia nesesidade pesoál.
“Ha’u iha serteza katak programa ida-ne’e sertifika esforsu edukasaun la formál husi foin-sa’e sira iha mundu tomak no sei sai benefísiu kapas ba Sala Leitura Xanana Gusmão, nomós ba instituisaun sira seluk ne’ebé atu implementa programa ne’e iha ita-nia rai, inklui eskola Ensinu Sekundáriu Públiku,” Ministra informa iha Xanana Reading Room, Bidau-Lecidere, Sesta ne’e.
Ministra nota, merkadu traballu oras ne’e ejize ema tenke gradua atubele hetan serbisu, maibé ho programa prémiu internasionál ida-ne’e sei ajuda barak.
“Programa ne’e fó esforsu atu apreende buat ruma ne’ebé gosta loos mak maneira kapas atu enkoraja ita-nia estudante no juventude atu hakarak apreende durante sira-nia moris tomak, liuliu ba sira ne’ebé iha talentu,” nia akresenta.
Notísia relevante : Global Inner Peace estabelese biblioteka labarik iha Xanana Reading Room
Iha sorin seluk, Jestór ba programa Prémiu Hakbiit Juventude ba Dezenvolvimentu, Kay Olo Sword Gusmão, dehan, programa ne’e la’o ho serbisu ekipa tuir karakterístika no kontestu Timor nian hodi asegura katak programa ne’e relevante no joven sira iha Timor bele aproveita tanba barak mak envolve-an ba atividade no programa oinoin maibé laiha oportunidade.
“Ha’u sempre kontente kuandu haree joven sira-nia vontade atu serbisu no buka esperiénsia foun. Joven sira-ne’e la hein oportunidade maibé sira kria rasik sira-nia oportunidade no kondisaun atu dezenvolve sira-nia an,” Jestór programa katak.
Programa ne’e hetan apoiu husi organizasaun The Duke of Edinburgh’s Award inklui empreza 100 iha Austrália ho orsamentu. Atividade sei hala’o durante tinan-tolu no sei tama to’o area rurál.
Atividade ne’e hetan partisipasaun husi Primeiru-Ministru, Kay Rala Xanana Gusmão, membru Governu balun, parseiru dezenvolvimentu sira, grupu juventude inklui estudante sira.
Jornalista : Alexandra da Costa
Editora : Julia Chatarina
