DILI, 31 Maiu 2025 (TATOLI)–Antigu Membru Parlamentu Nasionál husi Negro Orientál, Arnolfo Teves Jr, ne’ebé foin lalais liubá deportadu husi Timor-Leste, sei la hetan tratamentu espesiál.
Informasaun ne’e hato’o husi Vise-Ministru Justisa Filipina, Raul Vasquez, liuhusi Ajénsia Notisioza Filipina, ne’ebé TATOLI asesu, sábadu ne’e.
Teves oras ne’e daudaun detidu iha Sentru Detensaun Gabinete Investigasaun Nasionál (NBI-sigla ingleza), iha Muntinlupa, hodi hein desizaun Tribunál kona-ba fatin detensaun ninian.
“Oras ne’e, nia detidu iha Sentru Detensaun NBI, ne’ebé lokalizadu iha BuCor, besik edifísiu NBI, iha Taft,” Vise-Ministru dehan liuhusi fórum notísia, iha Kapitál Quezon.
Notísia relevante: Governu Timor-Leste entrega ona Arnolfo Teves bá Autoridade Filipina
Teves alegadu ba krime oinoin, inklui pratika asasinatu ida grave hasoru Antigu Governadór Negro Orientál, Roel Degamo, iha tinan 2023 no kazu omisídiu sira seluk iha tinan 2019.
Vasquez elojia kooperasaun serbisu entre Timor-Leste no Filipina relasiona ho esforsu deportasaun antigu membru Parlamentu referidu.
Governu Timor-Leste iha 28 Maiu liubá deside deporta no proibe Teves fila-hikas mai Timor-Leste durante dékada ida (tinan sanulu) tanba ninia prezensa ne’e konsiderada ameasa estabilidade no interese nasionál, iha-ne’ebé bele distúrba relasaun bilaterál país rua.
Medida ida-ne’e foti hafoin liu fulan-rua resin dezde Governu Filipina liuhusi Departamentu Negósiu Estranjeiru hatudu sira-nia arrependimentu ba desizaun nasaun joven ne’e (Timor-Leste), iha-ne’ebé antes ne’e rejeita estradisaun ba Teves.
TATOLI
