DILI, 02 Juñu 2025 (TATOLI) – Diresaun Nasionál Transporte Terrestre (DNTT) husu ba motorista sira atu hakbesik an ba edifísiu DNTT Balide Dili hodi foti xapa matríkula orijinál ba karreta no motór ninian.
Xefe Departamentu Sekretariadu Apoiu Tékniku Administrasaun DNTT, Nélson Sequeira, hateten DNTT prevee, iha tinan ne’e, $764.680 hodi prodús xapa matríkula orijinál ba karreta hamutuk 19.500 no motór 54.468.
“Ha’u husu ba públiku, liuliu motorista sira ne’ebé durante ne’e uza plat provizóriu hahú ohin bele mai foti ita-boot sira-nia xapa espesiál no xapa orijinál ba karreta privadu nian husi B.20-000 TL to’o B.23-999 no xapa ba motór Z-0000 TL”, Nelson Sequeira informa ohin.
Lembra katak, iha 2024, DNTT halo produsaun ba xapa matríkula karreta no motór hamutuk rihun 10 ho totál orsamentu rihun $110.
Aleinde ne’e, DNTT tau rihun $56-resin hodi halo produsaun ba livrete hamutuk 11.263, husi númeru ne’e distribui hotu ona ba munisípiu sira.
Notísia relvante : https://tatoli.tl/2024/09/03/dntt-sei-distribui-xapa-matrikula-10-000-ba-karreta-motor-iha-tinan-nee/
Jornalista: Arminda Fonseca
Editora: Maria Auxiliadora
