AILEU, 02 Juñu 2025 (TATOLI) – Iha ámbitu selebrasaun Loron Mundiál Oseanu, Primeiru-Ministru, Kay Rala Xanana Gusmão, lansa kampaña sensibilizasaun ho tema O Mar Começa Aqui! A Economia Azul de Montanha ao Mar iha Suku Seloi-Krak, Postu Administrativu Aileu Vila, Munisípiu Aileu.
Inisitiva ne’e hodi fó hanoin ba ema hotu katak Ha’u-nia Tasi, Ha’u-nia Timor, hahú iha foho sira no tun ba tasi no husi tasi bá foho sira, nu’udar kompromisu Governu.
Xefe Governu iha nia diskursu destaka liu kona-ba importánsia sustentabilidade rekursu biodiversidade sira iha lagoa Suku Seloi-Kraik, tanba ne’e husu ba komunidade iha suku referidu atu servisu hamutuk hodi halo kosenservasaun ambientál.
Xanana Gusmão afirma katak Governu lori programa selebrasaun Semana Mundiál Oseanu ba iha Seloi-Kraik, tanba iha signifikadu espesiál no louva autoridade lokál, liliu ba joven sira, tanba populasaun iha fatin ne’e hatudu nia domin ba natureza ho biodiversidade di’ak tebes.
“Imi hatudu los imi nia domin ba natureza hodi bele kuidadu bee ne’e [Lagoa Seloi-Kraik], ba animál ne’ebe hamutuk ho ita, la estraga malu, tanba fiar ba imi-nia domin la tama mai arbiru iha imi nia ai-horis iha toos laran”, nia dehan.
Primeiru-Ministru husu mós ba komunidade iha Suku ne’e atu kuidadu ambiente no biodiversidade liuhusi asaun labele soe lixu arbiru ba mota, tanba bee lagoa Seloi-Kraik sulin too ba Loes no Tasi Tolu.
“Aileu mos tenki bolu atensaun, iha vila laran, Suku no Aldeia sira katak bainhira imi halo foer, ami iha área sira tasi ibun mak sei simu foer, tanba sei estraga ita-nia tasi. Ba ida ne’e mak ba ekonomia azul mós hahú husi ne’e mak ba to kraik [tasi], maibe favor ida aviza ba sira bee hela iha mota ninin, ami mak simu imi nia foer”, nia bolu atensaun.
Xanana rekoñese katak tasi ne’ebé moos mak sei lori benefísiu ba komanidade, tanba ne’e hein katak, liuhusi kampanã sensibilzasaun ne’e, entidade hotu bele sensibilizada kona-ba importánsia ba prezervasaun ekosistema tasi ni’an nune’e bele kontribui ba sustentabilidade futuru nasaun ni’an.
Xefe Governu hatete ekonomia azul la’os de’it atu aproveita nia rekursu sira, maibe oinsá atu prezerva no dezenvolve ambiente ida ne’ebé fó benefísiu ba jerasaun foun.
Iha fatin hanesan, Prezidente Autoridade Munisipál Aileu, João Bosco do Santos, hatete maske Aileu laiha tasi, maibá iha lagoa Seloi-Kraik ne’ebé furak no riku ho nia biodiversidade.
“Liga ho ekonomia azul, há’u kaer liu ba pilar tolu: ekonomia, sosiál no ambiente, tanba área ne’e potensiál ba haki’ak ikan no ortikultura”, João dos Santos haktuir.
Dirijente ne’e promete katak sira sei konserva lagoa Seloi-Kraik hodi transforma ba ekoturismu hodi fo rendimentu ba komunidade lokál. “Haree ba oin liga ho ekonomia azul, presiza kooperasaun di’ak entre autoridade lokál ho Governu sentrál oinsa atu dezenvolve setór agrkultura no turismu iha Seloi-Kraik”, nia sujere.
João dos Santos mos agradese tebes ba Ezekutivu, liuhusi politika moderniza agrikultura, tanba abitante liu rihun haat iha Suku referidu iha natar hektare 163, iha tinan hirak liu ba iha natar balu de’it mak kuda haree, maibé ho polítika Ministériu Agrikultura, Pekuária, Peska no Floresta ni’na, ohin loron laiha ida mak abandonadu.
Iha eventu ne’e, realiza mos atividade oioin hanesan husik fini ikan ba Lagoa Seloi-Kraik, kolleta haree no modo, inklui assinatura plaka ida hodi reitera kompromissu Governu ni’an ba prezervasaun ambientál no kontribui ba dezenvolvimentu sustentável.
Partisipa iha serimónia ne’e, Vise-Primeiru-Ministru, Francisco Kalbuadi, Ministru Agrikultura, Pekuária, Peska no Floresta, Marcos da Cruz, Ministra Saúde, Élia Amaral, inklui Sekretáriu Estadu Peskas, Domingos dos Santos, Sekretáriu Estadu Floresta, Fernandino Vieira, Sekretáriu Estadu Komunikasaun Sosiál, Expedito Ximenes, líder komunitáriu, estudante no abitante Seloi-Kraik.
Notísia relevante: Governu Selebra Loron Mundiál Oseanu, “Ha’u-nia tasi no ha’u-nia Timor”
Jornalista: Afonso do Rosário
Editora: Isaura Lemos de Deus
