DILI, 02 Juñu 2025 (TATOLI)-Prezidente Komisaun Funsaun Publika (KFP), Agostinho Leténcio, informa teste kandidatu ba bolsa Ensinu Sekundáriu ne’e barak mak falla tanbá ladún prepara.
“Bolsa kandidatu ne’ebé agora tuir teste ne’e hamutuk 291 mak passa ho valór 60 ba leten. Ita haree dalabarak oportunidade ba servisu iha maibé ladún iha preparasaun ida, ne’ebé mai tuir teste no dala-ruma ladún lee. Ne’ebé teste ida ne’e barak falla tanba ladún prepara”, nia dehan ba jornalista sira iha KFP Matadouru, ohin.
Tuir nia, Ministériu Edukasaun (ME) hamutuk ho KFP prepara ona matriks no fahe antes teste ne’e hahú.
“Tanba ministériu edukasaun ho KFP iha ona matriks ne’ebé mak fahe ba hotu-hotu no dala barak la lee kuandu sira ne’ebé passa ita husu sira dehan ami lee, entaun ita haree katak dalabarak ne’e ita ladún prepara didiak”, katak tan.
Ba kandidatu sira ne’ebé lee didiak, nia dehan tanba teste ne’e liga ho asuntu jerál ho KFP no liga mós sira nia área espesializada hanesan ekonómia karik tenke prepara ekonómia no metodolojia, nunee sira bele hatene oinsá atu bele hanorin.
Selesaun bolsa kandidatu ba Ensinu Sekundáriu tinan-ida ne’e, kandidatu sira-ne’ebé admitidu atu tuir teste mak hamutuk na’in-10.679.
Husi númeru ida-ne’e, feto hamutuk na’in-5.748 no mane na’in-4931. Nia dehan, interesante tebes haree númeru ida-ne’e, tanba númeru aplikante feto hatudu interese maka’as hodi aplika ba konkursu bolsa kandidatu nian.
Teste ne’e hahú iha loron 19 Maiu no sei remata iha loron 16 Juñu 2025.
Notísia relevante: ME rejistu ona kandidatura ba vaga sekundáriu hamutuk 16.437
Jornalista : Osória Marques
Editora : Rita Almeida
