Kódigu Rekuperasaun no Insolvénsia fó solusaun ba emprezáriu ne’ebé enfrenta situasaun instavel
DILI, 02 Juñu 2025 (TATOLI) – Vise-Primeiru Ministru Vise-Primeiru Ministru no Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay, hateten proposta lei númeru 13/VI (2a) kona-ba Kódigu Rekuperasaun no Insolvénsia importante atu fó solusaun ba emprezáriu sira ne’ebé enfrenta situasaun instavel.
“Lei ne’e importante tebes hodi favorese no aumenta konfiansa investidór sira ho setór emprezariál iha Timor-Leste”, Kalbuadi hateten iha debate faze jeneralidade ba proposta lei referida iha reuniaun plenária Parlamentu Nasionál, segunda ne’e.
Nia hateten to’o agora Timor-Leste seidauk iha rejime efetivu ida kona-ba insolvénsia no situasaun ida-ne’e mak bele estraga funsionamentu merkadu ba emprezáriu sira.
Proposta lei ida-ne’e hala’o ona kompromisu internasionál, inklui ho Organizasaun Mundiál Komérsiu (OMK) no prosesu integrasaun ba Asosiasaun Nasaun Sudeste Aziátiku (ASEAN, iha inglés) hodi fó solusaun ba problema ne’ebé emprezáriu sira enfrenta iha situasaun ne’ebé la estavel.
“Objetivu prinsipál proposta lei ida-ne’e mak atu kria rejime legál ida ne’ebé klaru atu permite empreza sira rekupera bainhira hetan situasaun insolvénsia ou se viavel no taka empreza ne’ebé laiha posibilidade atu rekupera atu ita hatete atu ba bankarota”, akresenta.
Vise-primeiru-ministru realsa vantajen ida-ne’e mak fó prioridade ba empreza sira atu halo rekuperasaun karik laiha viavel tenke taka liu likidasaun. No estabelese mekanizmu efisiente hanesan balkaun ba rekuperasaun no insolvénsia no administradór ho rekuperasaun insolvénsia hanesan entidade ida responsavel.
“Proposta ne’e fó mós enfaze ba solusaun administrativa ne’ebé lidera husi Governu atu garante efetividade no supervizaun no ajusta ho realidade situasaun iha Timór”, reforsa.
Kalbuadi Lay husu deputadu sira atu aprova proposta importante ida-ne’e ne’ebé sei fó kontribuisaun ekonómika no instituisional iha Timor-Leste.
Notísia relevante: Komisaun A aprova proposta Lei Kódigu Rekuperasaun no Insolvénsia
Jornalista: Nelson de Sousa
Editora: Maria Auxiliadora
