DILI, 02 Juñu 2025 (TATOLI) – Parlamentu Nasionál (PN), liuhusi reuniaun plenária aprova proposta lei númeru 13/VI (2a)-Kódigu Rekuperasaun no Insolvénsia ho votu a favór 49, kontra 0 no abstensaun rua.
“Lei ne’e pasa iha jeneralidade”, Prezidente Parlamentu Nasionál, Maria Fernanda Lay, fó sai iha sala plenária Parlamentu, segunda ne’e.
Nune’e, meza haruka hikas proposta lei referida ba Komisaun A ne’ebé trata Asuntu Konstitusionalidade no Justisa hodi trata inisiativa lejislativa ne’e iha espesialidade hodi diskute espesífiku kada artigu.
Tuir rejimentu Parlamentu, iha diskusaun faze jeneralidade ne’e foka ba prinsípiu no objetu proposta.
Bazeia ba relatóriu no apresiasaun inisiál husi Komisaun A proposta lei ne’e prienxe rekezitu legál no konstituisionál atu diskute no aprova iha faze jeneralidade iha plenária.
Deputadu CNRT, Marcos Soares Martins, konsidera proposta lei ne’e importante atu asegura estabilidade ekonómika, ajuda empreza sira ne’ebé iha problema finanseiru atu la fó falénsia direta, maibé simu tempu ou sei fó oportunidade atu reorganiza hodi kontinua funsiona.
“Asegura postu traballu ba sidadaun timoroan, garante empreza no fó tempu atu halo rekuperasaun, nune’e sidadaun sira kontinua iha empreza ne’ebé hetan rekuperasaun”, realsa.
Deputadu husi bankada Governu ne’e dehan lei ida-ne’e bele fó klareza kona-ba insolvénsia, bele fó konfiansa ba investidór no instituisaun finanseira atu investe iha Timor-Leste.
“Tanba sira hetan sistema legál bele problema dívida ho justu, fó dadus ekonomia legál no formál husi empreza ne’ebé ho mikro negósiu sira hala’o iha ámbitu formál, tanba iha lei hodi garantia no hetan motivasaun atu rejista legalmente no kontribui ba ekonomia nasaun”.
Nia reforsa lejizlasaun ne’e armoniza sistema legál tuir rejional no internasionál. Timor-Leste bele adota sistema ne’ebé armoniza ho lei internasionál hanesan Komunidade País Ko’alia Lian Portugés (CPLP, siglá portugés), ASEAN ne’ebé Timor-Leste prepara an atu tama daudaun.
“Ikus fó klaridade no justu ba kreadór no devedór, lei ida-ne’e bele estabelese prosesu legál ne’ebé justu no transparente ba ema ne’ebé fó empresta no simu empresta sira sei hetan klaridade no direitu no obrigasaun ne’ebé atu kumpre”, hateten.
Deputadu KHUNTO, António Verdial de Sousa, konsidera lei ne’e importante ba emprezáriu sira, maibé fó hafoin Governu kria kondisaun no kria lejizlasaun komplementár bainhira lei ne’e tama implementasaun bele lao ho di’ak.
Proposta lei Kódigu Rekuperasaun no Insolvénsia ne’e iha artigu hamutuk 225.
Rekorde katak, iha 19 Juñu 2024, Konsellu Ministru aprova projetu proposta lei hodi kria Kódigu Rekuperasaun no Insolvénsia ho objetivu atu promove investimentu, nune’e mós transforma no moderniza ekonomia nasionál.
Notísia relevante: Kódigu Rekuperasaun no Insolvénsia fó solusaun ba emprezáriu ne’ebé enfrenta situasaun instavel
Jornalista: Nelson de Sousa
Editora: Maria Auxiliadora
