DILI, 02 Juñu 2025 (TATOLI)–Prezidente Komisaun Funsaun Públika (KFP), Agostinho Letêncio, hatete reforma obrigatóriu ne’ebé sei akontese tinan oin hanesan dalan ida prepara joven sira no sira ne’ebé idade produtivu ba funsionáriu públiku.
Funsionáriu sira ne’ebé sei reforma, automatika tama iha sistema Institutu Nasionál Seguransa Sosiál (INSS), hodi bele kobre sira-nia pensaun.
“Ita-nia estatutu funsaun públika depois hetan autorizasaun husi parlamentu ho lei númeru 7/2024 no ita halo ona alterasaun ba estatutu funsaun públika ho dekretu lei 9/2025 fó ona dalan ba funsionáriu sira ne’ebé mak atinje ona tinan 65 atu reforma”, dehan Agostinho Letêncio ba jornalista sira iha Matadouru, segunda ne’e.
Nia hatutan, lei ne’e foin promulga iha tinan-ne’e no tuir ita-nia planu hahú janeiru 2026 funsionáriu hotu-hotu ne’ebé mak atinje ona tinan 65 sei hetan reforma obrigatóriu.
“Ida-ne’e dalan ne’ebé mak di’ak para bele hahú ona no prepara fali joven sira ba funsionáriu públiku. Tanba depois prosesu ida-ne’e ita ko’alia ona ho INSS para bele akompaña sira, liuliu bele kobre sira-nia pensaun. Ami hanoin katak depois sira reforma ita transfere fali ba Institutu Nasionál Seguransa Sosiál atu kontinua ho sira-nia pensaun”, nia dehan.
Prezidente hatutan, KFP jere de’it funsionáriu públiku ne’ebé mak atu reforma no bazeia ba estatutu funsaun públika nian, enkuantu titulár sira ne’e la-kobre iha estatutu funsaun publika.
Prezidente KFP, Agostinho Letêncio, dehan idade reforma ne’ebé ho idade 60-resin hamutuk 4.752. “Liga idade nian, totál funsionáriu públiku ne’ebé ita rejista ne’e funsionáriu ne’ebé liu ona idade 60 até 89”.
Situasaun forsa traballu iha kontestu funsaun públika ba tinan-2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, neʼebé kompostu husi feto 14.115 no mane 25.265.
Husi númeru ne’e funsionáriu permanente 33.004, ajente administrasaun públika 6376.
Notísia relevante: Tinan oin KFP implementa reforma obrigatóriu ba funsionáriu
Jornalista : Osória Marques
Editora : Rita Almeida
