DILI, 02 Juñu 2025 (TATOLI)-Governu Xina ho Fundu husi Nasoins Unidas ba Labarik (UNICEF, sigla inglés) no Ministériu Edukasaun (ME), oferese ekipamentu Teknolójia, Informasaun no Komunikasaun (TIC sigla-portugés), ba eskola hamutuk 34.
Benefisiáriu ba ekipamentu TIC hosi eskola 34 ne’e hosi munisípiu Dili, Bobonaru, Manufahi no Kovalima, hodi utiliza iha prosesu aprendizajen.
Enkuantu, totál ekipamentu hamutuk 102, kompostu hosi laptop 34, projetór 34 no USB 34.
Reprezentante UNICEF iha Timor-Leste, Patrizia Di Giovanni, haktuir apoiu ida-ne’e fasilita ba dezastre sira ne’ebé akontese, tantu naturál ka ema-nia hahalok, hamosu ameasa signifikativu ba prosesu aprendizajen estudante sira-nian.
“Ita labele prevene dezastre sira, ita bele asegura katak, ita-nia eskola sira iha posibilidade boot liu atu funsiona no mantein edukasaun labarik sira-nian, durante emerjénsia. Adopta métodu aprendizajen alternativu sira, hanesan aprendizajen online hatudu ona, hanesan sinál esperansa nian ba kontinuidade aprendizajen durante tempu emerjénsia sira”, Reprezentante UNICEF hatete iha INFORDEPE Balide, segunda ne’e.
Ministra Edukasaun, Dulce de Jesus Soares, hatete ekipamentu TIC ne’e importante tebes, ajuda eskola sira, liuliu manorin sira hala’o prosesu aprendizajen.
“Apoiu ekipamentu eletróniku ne’e hodi ajuda no fasilita estudante no manorin iha prosesu aprendizajen loron-loron nian”, ME dehan.
Embaixadora Xina iha Timor-Leste, Wang Wenli, agradese ba UNICEF iha TL no Ministériu Edukasaun, ba esforsu hotu, hodi implementa projetu kooperasaun Xina iha Timor-Leste.
“Ekipamentu ne’e oinsá atu hakbiit estudante sira no eskola sira”, dehan Wang Wenli.
Enkuantu, Reprezentante profesóra Ensinu Báziku Filiál (EBF) Beduko, Ondina Natalia Oliveira, kontente ho ekipamentu ne’ebé oferese, tanba bele ajuda prosesu aprendizajen la’o nafatin, bainhira iha dezastre ruma.
“Ami sente kontente no haksolok ho materiál sira, ne’ebé Ministériu Edukasaun ho UNICEF fahe ba eskola ne’ebé hetan inundasaun, espera katak ami bele utiliza hodi hala’o prosesu aprendizajen ho di’ak liutan”, Ondina dehan.
Momentu ida-ne’e, sira ne’ebe simu apoiu ekipamentu, frekuenta kedas formasaun durante semana ida, hodi bele utiliza ekipamentu ne’e ba prosesu aprendizajen.
“Aliende ne’e fó formasaun ba manorin sira, atu garante katak ekipamentu ne’ebé oferese bele uza duni, hodi ajuda iha prosesu aprendizajen”, dehan Ministra Edukasaun, Dulce de Jesus Soares.
Mimistra espera liuhosi formasaun ne’e, pelumenus sira balu bele hatene uza iha eskola sira, nune’e ema hotu-hotu tenke ho seriedade, no Ministériu Edukasaun kontinua moderniza prosesu aprendizajen iha Timor-Leste.
Reprezentante UNICEF iha Timor-Leste, Patrizia Giovanni, dehan eskola hotu iha Timor-Leste sei iha nafatin lakuna, profesór sira-nia kapasidade, atu hato’o lisaun sira kona-bá TIC no liuhosi plataforma dijitál sira. Nune’e alende oferese ekipamentu TIC no fasilita mós formasaun ba manorin sira.
Tanbá tuir peskiza ida ne’ebé hala’o hosi Ministériu Edukasaun no UNICEF iha tinan 2022 hatudu katak 63% hosi profesór sira fó sai katak, sira la hetan formasaun kona-ba aparellu dijitál sira ka internet no 12% de’it, hosi profesór sira maka sente fiar-an, kona-ba uza aparellu dijitál sira iha sira-nia lisaun sira.
“Entaun liuhosi formasaun ida-ne’e, ami hein katak aplikasaun hanorin online, sai hanesan parte integrante ida, oinsá profesór sira iha Timor-Leste hanorin iha klase laran, bainhira labarik sira labele ba eskola, tanba razaun ruma ka seluk aprendizajen bele kontinua”, nia dehan.
Embaixadora Xina iha Timor-Leste, Wang Wenli , dehan formasaun ne’e ho objetivu hasa’e profesór sira-nia komprensaun, domíniu no utilizasaun inovativu, ba ekipamentu TIC no ferramenta hanorin online.
Notísia relevante: ME halo akizisaun ekipamentu elektróniku ba ESJP 23 iha territóriu
Jornalista : Osória Marques
Editora : Rita Almeida
