DILI, 03 Juñu 2025 (TATOLI)-Prezidente Instituisaun Nasionál Seguransa Sosiál (INSS), Arlindo Pinto, hatete daudaun ne’e benefisiáriu 500 mak asesu ona ba Mobile App seguransa sosiál.
“Kona-ba rejistu Mobile App ne’e ita rejistu iha fulan-Abríl, agora entidade ne’ebé asesu hamutuk 500-resin, ne’ebé ho nia user husi seguransa sosiál oferese password ba sira hodi bele asesu”, dehan Arlindo Pinto iha nia knaar fatin Kaikoli, tersa ne’e.
Nia esplika, benefisiáriu sira ne’ebé bainhira asesu mak sistema la simu tanba seidauk halo rejistu foun, tanba ne’e husu ba empregadór sira atu rejistu traballadór iha sistema seguransa sosiál.
“Tanba ne’e mak responsabilidade ne’e la’ós maihusi seguransa sosiál, responsável ne’e ba fali iha empregadór anteriór ne’e, empregadór tenke mai rejistu, tanba ne’e mak dalaruma sira hatama dadus la kompletu tanba seidauk mai rejistu iha seguransa sosiál”, nia dehan.
Nia mós informa ba traballadór sira karik antes ne’e servisu iha instituisaun seluk, tenke lori dadus kompletu husi instituisaun anteriór atu rejistu foun.
“Fó hanoin ba traballadór sira atu ba fali iha instituisaun anteriór foti fali dokumentu para mai kompleta fali dadus iha sistema, lae aban-bainrua kuandu traballadór ne’e reforma nia iha direitu tomak atu akumula husi servisu anteriór, maibé tenke rekolla fali dokumentu antes ne’e iha instituisaun anteriór, depois mak ita sura pensaun iha sistema seguransa sosiál”, nia esplika tan.
Husu ba iha entidade empregadór sira no traballadór sira atu mai rekere iha sistema seguransa sosiál no kada fulan tenke entrega deklarasaun renumerasaun mai sistema seguransa sosiál, para verifika no ajusta.
Iha 2017 mai to’o iha fulan-Abril tinan 2025 empregadór sira ne’ebé rejistu ona mak hanesan setór privadu hamutuk 5.732 empregadór setór públiku hamutuk 119, inklui liña ministeriál sira, órgaun soberanu sira, no traballadór setór privadu hamutuk 84.373. Traballadór setór públiku hamutuk 77.785 mak rejistu ona iha sistema seguransa sosiál.
Nia dehan ba adezaun fakultativa ka pesoál sira ne’ebé mak hakarak kontribui ba seguransa sosiál ne’e hamutuk 13.106. Husi númeru ne’e ba benefisiáriu ne’ebé ita selu liu-liu ba setór públiku, ne’ebé tama iha rejime tranjitoriu, invalides hamutuk na’in-12, husi velise hamutuk na’in-921, pensaun sobrevivensia hamutuk na’in-1.530.
Enkuantu ba benefisiáriu rejime espesiál, invalides hamutuk na’in-8 velise hamutuk na’in-534, pensaun reforma ka sobrevivensia hamutuk 1.352.
“Subsídiu sira-ne’ebé mak tama iha sistema parantalidade ninian hanesan subsídiu morte husi 2017 mai to’o iha fulan-Abríl 2025, ita selu ona ba ema 122 , subsídiu maternidade selu ona ema 224, subsídiu paternidade selu ona ba ema 89 no subsídiu adosaun selu ona ba ema 2”, nia relata.
Notísia relevante: Empregadór mak rekere dadus traballadór hodi asesu mobile APP
Jornalista : Osória Marques
Editora : Rita Almeida
