DILI, 03 Juñu 2025 (TATOLI) – Investidór husi Singapura no Indonézia vizita, semana oin, bá Oekusi hodi observa terrenu atu halo investimentu iha rai-ketan ne’e.
Prezidente Autoridade Rejiaun Administrativa Espesiál Oekusi Ambenu (RAEOA), Rogério Lobato, informa investidór husi Singapura sei mai ho valór investimentu millaun $70 iha setór otelaria nian no husi Indonézia ho investimentu millaun $20 iha indústria téstil.
“Ita asina tiha ona kontratu, maibé sira presiza rai, entaun semana oin investidór sira sei bá haree rai, tanba hetan ona rai hamutuk ektare 69, tanba sira hakarak halo sira-nia fábrika rasik”, Rogério Lobato hateten iha Palásiu Governu, ohin.
Nia esplika bainhira investimentu ne’e la’o iha Oekusi maka sei prega traballadór hamutuk rihun 5, nune’e presiza terrenu boot.
“Sira sei bá haree loos ona, ita mós sei hahú ona rekruta Oekusi oan sira bá fábrika téstil nian [hodi bá] tuir formasaun [iha] Jakarta, iha ne’ebá apreende suku hena. Nune’e, fábrika ne’e loke ona sira bele filafali mai serbisu no otelaria nian mós sei bá tuir formasaun sira iha Bali no seluk tan, nune’e bele filafali mai serbisu”, adianta.
Lembra katak, iha 09 Abríl 2024, Prezidente Autoridade RAEOA, Rogério Tiago Lobato informa vontade investimentu husi Indonézia no Singapura iha Oékusi ba Primeiru-Ministru, Xanana Gusmão.
Nia fiar katak investimentu ne’e importante ba dezenvolvimentu Timor-Leste, liuliu iha Oekusi no nu’udar Prezidente Autoridade RAEOA nian iha responsabilidade atu informa ba xefe Governu molok hakat ba etapa tuirmai.
Aleinde ne’e, iha 27 fulan Marsu 2024, autoridade RAEOA asina ona akordu kooperasaun ida ho empreza Singapura, Moryoung Internasional Lda ho valór investimentu millaun $60 hodi dezenvolve otél Ambeno iha Oekusi.
Notísia relevante: Horta propoin atu RAEOA-ZEEDOA fó importánsia ba turizmu no otél
Jornalista: Arminda Fonseca
Editora: Maria Auxiliadora
