OEKUSI, 04 Marsu 2025 (TATOLI) – Prezidente Repúblika, José Ramos Horta, propoin atu Autoridade Rejiaun Administrativa Espesiál Oekusi Ambeno (RAEOA) no Komisaun Ezekutiva Zona Espesiál Ekonomia Dezenvolvimentu Oekusi Ambeno (ZEEDOA) atu investe iha turizmu no otél, nune’e bele atrai vizitante tantu rai laran no rai li’ur.
Xefe Estadu hato’o rekomendasaun ne’e tanba Oekusi nu’udar rai ketan ida iha Timor-Leste, ne’ebé hale’u direita husi nasaun viziñu Indonézia espesiálmenre provínsia Nusa Tenggara Timur (NTT).
Notísia relevante:RAEOA selebra akordu ho empreza Moryoung Ltd atu investe iha setór turizmu no agrikultura
“Ha’u espera atuál Autoridade RAEOA ho Koordenadór ZEEDOA bele apoia halo movimentu ba ekonómia Oekusi nian, tanba ho investimentu, kriasaun empregu, ha’u hatene konstrusaun otél ida la’o daudaun, depois Aero Dili mai kada semana dala-rua, sei bele aumenta tán halo ligasaun direta ho Dili Oekusi Kupang no Bali. Ne’e vizitante ou turista sei mai barakliu,” Xefe Estadu hateten ba jornalsita sira iha salaun Dominikana Oekusi, ohin.
Tuir Xefe Estadu katak, turizmu signifika agrikultór sira mós partisipa direta liuhusi negósiu, katuas no ferik sira, bele faan modo, ai-fuan no hahán ba otél inklui faan iha fatin turizmu sira.
“Ha’u hatene otél foun agora la’o daudaun, neineik ita realistikamente turista primeiru bele mai husi nasionál, husi NTT dalaruma bele halo futu manu ne’ebé ho profisionál iha Oekusi, entaun husi TTU, Atambua no TTS bele mai iha ne’e, no mós iha loke desportu tradisionál kompetisaun korrida Cavalo, ne’e signifika kadeia dezenvolvimentu kadeia turizmu atu kria empregu,” nia dehan.
Notísia relevante:PM Xanana propoin ba ZEEDOA implementa polítika TIA
Prezidente Repúblika mós observa estrada rurál sira dezde uluk to’o agora laiha mudansa tanba maioria konsentra barakliu iha área urbana hanesan Pante Makasar.
“Ita haree didi’ak saida mak di’akliu iha Oekusi, loke tan estrada luan boboot gasta osan ba estrada halo luan, maibé ema la uza no karreta laiha, presiza haree liuliu dezenvolvimentu rurál, estrada rurál sira tenke hadi’a atu fasilita povu asesu ba vila,” PR apela.
Entretantu, bazea livru Orsamentu Jerál Estadu (OJE) 2025 nian, Autoridade RAEOA prevee rihun $61,997, ho objetivu atu realiza servisu gastronómia, feira no expo, turizmu komunitária no edukasaun ambientál.
Notísia relevante:PM Xanana husu Autoridade RAEOA-ZEEDOA promove koordenasaun serbisu iha administrasaun públika
Jornalista: Abílio Elo Nini
Editór: Florencio Miranda Ximenes
